नेवाः राज्यया नितिं विशेष सहलह
येँ (झीगु स्वनिगः)
नेवाः स्वायत्त राज्य स्थापनाया नितिं नेवाः स्वायत्त राज्य मंकाः संघर्ष समितिया ग्वसालय् म्हिगः सोमवाः विशेष सहलह यात । उगु ज्याझ्वलय् एकीकृत माओवादीया नेवाः राज्यया इन्चार्ज नापं सांसद हितमान शाक्य, सांसदपिं दिलिप महर्जन, राजकाजी महर्जन, नेपाली कांग्रेसया तिर्थराम डंगोल, एमालेया मंगलसिद्धि मानन्धर लगायत संघर्ष समितिइ दुथ्याःगु घटकया नेतातय्सं नं न्वंवानादीगु खः ।
लिपांगु इलय् राज्यया पुनर्संरचना बाहेक न्हूगु संविधानया मस्यौदा पित हयेगु कुतः, नेपाली कांग्रेसय् नेवाः प्रदेशयात राजधानी प्रदेश यायेगु धकाः प्रस्ताव तयाः सहलह ब्याकेगु यानाच्वंगु विषयसं नेतातय्सं न्वंवानादीगु खः । वय्कःपिन्सं गुगु नं हालतय् संघीयता अर्थात राज्य पुनर्संरचना मदुगु संविधानयात स्वीकार मयायेगु, नेवाः प्रदेशयात राजधानी प्रदेशया रुपय् स्वीकार यायेगु जुइमखु धकाः न्वंवानादीगु खः ।
