माओवादीयात पिने लाकेगु खेल सुरु

कांग्रेस व मधेसी मोर्चाया दथुइ गोप्य सहमति

येँ (झीगु स्वनिगः)

प्रधानमन्त्री झलनाथ खनालं साउन २८ गतेया दुने राजीनामा बिइगु धकाः घोषणा यानादीगुलिं संविधानसभाया दक्ले तःधंगु दल एकीकृत नेकपा -माओवादीं)यात पिने तयाः हाकनं न्हूगु कथंया राजनीतिक समीकरण दयेकेगु कुतः जुयाच्वंगु दु । प्रमुख प्रतिपक्ष नेपाली कांग्रेस व मधेसवादी दलतय्गु मंकाःगु मोर्चां संयुक्त लोकतान्त्रिक मधेसी मोर्चाया नेतातय् दथुइ गोप्य सहमति जुइधुंकूगु सुत्रं धाःगु दु ।
मधेसवादी दल, कांग्रेस व एमालेया माधव कुमार नेपाल व केपी शर्मा ओली पक्षया नेतातय्त ज्वनाः माओवादीयात पिने तयाः न्हूगु सरकारया नितिं अथे कुतः याःगु खः । न्हूगु संविधान निर्माणया सवालय् दक्ले महत्वपूर्णगु पक्ष संघीयता अर्थात राज्यया पुनर्संरचनाया विषयसं दक्ले अप्वः नेपाली कांग्रेस व मधेसवादी दलया दथुइ विवाद जुयाच्वंगु खः । अथे जूसां सरकार दयेका वनेगु खँय् धाःसा निगुलिं पक्षं नापं जानाः वनेगु धकाः गोप्य कथं सहमति याःगु खनाः मनूत अजूचाःगु दु ।

आःया अवस्थाय् एकीकृत माओवादीयात सरकारं पिने तयाः वने फत धाःसा माओवादीयात पेलेयाये फैगु, माओवादीया साइज घटे जुइगु तायेकाः अथे कांग्रेस व मधेसवादी दलया नेतातय् दथुइ सहमति जूगु खः । अथे गोप्य सहमति जूगु इलय् मधेसी मोर्चायात आः संसदया प्यंगूगु तःधंगु शक्तिया रुपय् स्वीकार यायेगु, राष्ट्रिय सहमतिया नितिं स्वंगू दल जक मखु मधेसी मोर्चायात नं दुथ्याकेगु नितिं कांग्रेसं स्वीकार याःगु दु । नापं माओवादी बाहेकया शक्तित छथासं हयाः साउन २८ गतेलिपा न्हूगु हे सरकार दयेकेगु विषयसं नं नेतातय् दथुइ सहमति जूगु खः धकाः सूत्रं धाःगु दु । लोकतान्त्रिक मोर्चाया नामं मेमेगु दलतय्त नं दुथ्याकाः वनेगु नितिं नं सहलह जूगु दु धकाः मधेसवादी दलया नेतातय्सं थःपिनि लिक्क लाःपिं कार्यकर्तातय्त जानकारी बियादीगु दु । वंगु जेठ महिनाय् संविधानसभाया म्याद थप यायेगु सवालय् कांग्रेस व मधेसवादी दलतय्गु दथुइ छगू कथं समीकरण जूगु खः । उकिं लिपा मधेसीवादीतय्सं थःपिन्त प्यंगूगु शक्तिया रुपय् स्वीकार यायेमाः धकाः प्रस्ताव याःगु व कांग्रेसं स्वीकार मयायेवं इमि दथुइया स्वापू स्यना वंगु खः । आः हाकनं सत्ताया नितिं समीकरण जुइवं भारतया डिजाइन कथं माओवादीयात पिने तयेगु कुतः जूगु मखुला धकाः बुद्धिजीवीतय्सं टिप्पणी यानाहःगु दु ।

नेपाली कांग्रेस राज्य पुनर्संरचना आयोग दयेका संविधानसभाया राज्य पुनर्संरचना नापं राज्य शक्ति बाँडफाँट समितिं तयार याःगुयात तप्यंक हे अस्वीकार यायेगु अले न्हूगु हे कथं प्रस्ताव -नेवाः स्वायत्त प्रदेशयात राजधानी प्रदेशयानाः मुक्कं न्हय्गू प्रदेश) दयेकाः वनेमाः धकाः तायेकाच्वंगु दु । अथेहे, मधेसवादी दलतय्सं गुगु नं हालतय् राज्य पुनर्संरचना आयोग दयेकाः वनेमजिउ धकाः धयाच्वंगु खः । थज्याःगु अवस्थाय् निगू पक्ष छथासं लाःवःगुलिं मनूतय्सं न्ह्यसः तयाहइगु स्वाभाविक हे खः । हाकनं कांग्रेसं थौंकन्हय् राजधानी प्रदेश नापं न्हय्गू प्रदेशया बारे सहलह ब्याकाच्वंगु दु ।