युथ फोर्स नेतायात स्याना बिल

हत्या लिपा जनकपुरय् प्रहरीया कडा सुरक्षा व्यवस्था

येँ (सन्ध्या टाइम्स)/सत्तारुढ पार्टी एमालेया ल्याय्म्ह भातृ संगठन 'युथ फोर्स'या धनुषा जिल्लाया नेता तातवर मुखियायात थौं सुथय् गोलीं कयेकाः स्याना बिउगु दु। विराटनगरय् पत्रकारयात दाःम्ह युथ फोर्स नेतायात प्रहरीं मालाच्वंगु खँयात कयाः थ्व निकाय चर्चाया विषय जुयाच्वंगु खः ।

थौं सुथय् जनकपुरय् ल्वाभः ज्वनावःपिं निम्ह मनूतय्सं आकाझाकां गोलीं कयेकाः ३८ दँ दुम्ह मुखियायात स्याना बिउगु खः। मुखिया युथ फोर्सया धनुषा निर्वाचन क्षेत्र नं. ४ या क्षेत्रीय दुजः खः ।

थौं सुथय् पौने ११ बजे जनकपुर नगरपालिका वडा नं. १२ स्थित कुवारामया थःगु हे छेँनं बजाःपाखे वनाच्वंगु इलय् मुखियायात आकाझाकां गोलीं कयेकूगु खः। गोली वयागु छातीइ लाःगु खः। गोलीं कयाः घाःपाः जूम्ह मुखियायात तुरुन्त जनकपुर अस्पताल ब्वाकूगु खःसा अन हे वासः याकुयाकुं वयागु मृत्यु जूगु खः ।

उगु घटनायात कयाः ल्वाभः नाप छम्ह मनूयात ज्वने धुनागु खँ अनया प्रहरी उपरिक्षक हरिबहादुर पालं कनादीगु दु। मुखियायात गोलीं कयेकाः बिसिउँ वनाच्वंगु इलय् स्थानीय मनूतय्गु ग्वाहालिं सर्लाही मलंगवाया २२ दँ दुम्ह मेकेश पडितयात ज्वंगु खः। घटनायात कयाः प्रहरीं अनुसन्धान न्ह्याकाच्वंगु दु। घटना लिपा जनकपुरय् सुरक्षाकर्मीत ब्यापक रुपं परिचालन यासें सुरक्षा व्यवस्थायात अझ कडा यानागु खँ नं प्रहरीं धाःगु दु। मुखियायात उमिसं छाय् गोलीं कयेकूगु खः व उपिं सु खः धइगु खँ धाःसा सी मदुनि ।