सार्क क्षेत्रया हे दकलय् तमागु मेवा मा

ख्वप (सन्ध्या टाइम्स)/ ख्वप नगरपालिका वडा नं.-५ याछेँ त्वालय् दक्षिण एशियाय् हे दकलय् तःमागु मेवा मा दुगु खँ उगु मेवा माया थुवाः राजाराम नापितं दावी यानादीगु दु। झिदँ तिनि दुगु उगु मेवा मा थौंकन्हय् प्यतँ न्यातँ तजाः जुइक थहां वनाः ३४/३५ फिट तमा जुइधुंकूगु दु। दँय् १-२ फिट तमा जुयाच्वंगु उगु सिमा न्हापा ला स्वारस्वार हे तमा जुयाः वयाच्वंगु खः। सामान्य मेवा उलि थ्यंक तमा जुइ मखु ।

उगु मेवा माय् दँय् द्वलंद्वः मेवा सइगु व सलंसः ला खाये नं दइगु जुयाच्वंगु दु। मा पिनाः स्वदँ दुबलय्निसें मेवा खाये दुगु उगु सिमा न्हापा छमा जुइक बुया वःगु खःसा आः उकी हे निमा अलग्ग अलग्ग जूवंगु खँ नं राजारामं कनादिल। वय्कलं न्हापा थ्व सिमा ख्वपय् जक दकलय् तमागु धकाः दावी यानादीगु खःसा आः थीथी थासय् न्यनेकने यानादीबलय् ख्वप वा नेपालय् जक मखु दक्षिण एशियाय् हे दकलय् तमागु मेवा मा धइगु सीदुगु खँ कनादिल ।