किपूया डा. हिराबहादुर महर्जन भीसी नियुक्त
येँ (सन्ध्या टाइम्स)/त्रिभुवन विश्वविद्यालयय् किपूमितय्गु अग्राधिकार दयेमाः धकाः नेवाः स्वायत्त राज्य मंकाः परिषद् किपूपाखें निरन्तर रुपं न्ह्याका वयाच्वंगु आन्दोलनया लिच्वः कथं सरकारं त्रिविविया खाली जुयाच्वंगु उपकुलपति (भीसी) पदय् किपुली हे च्वंम्ह डा. हिराबहादुर महर्जनयात नियुक्त याःगु दु ।
मंकाः परिषदं छुं दिं न्ह्यः जक किपूमि हे सक्षम व योग्य ब्यक्ति दयेक दयेकं पिनेयापिं मनूत हयाः त्रिविविया उपकुलपति दयेके दइ मखु धासें माग न्ह्यब्वःगु खः। लिसें थःपिनि माग पूरा मजुल धाःसा अझ सशक्त कथं आन्दोलन यायेगु जुइ धकाः सरकारयात ख्याच्वः तकं बियातःगु खःसा सरकारं उकियात हे कदर यासें अन्ततः किपूमि डा. हिराबहादुर महर्जनयात उपकुलपति नियुक्त याःगु खः। त्रिविविया कीर्तिपुर क्याम्पसय् प्रिन्सिपल जुयाः नं ज्या यानादीधुंकूम्ह वय्कः आः नं अन हे प्राध्यापक कथं अध्यापन यानाच्वनादीगु दु ।
डा. महर्जनयात उपकुलपति नियुक्त याःगुलिं नेवाः स्वायत्त राज्य मंकाः परिषदं लसता प्वंकूगु दु। तत्कालिन अवस्थाय् किपूमितय्गु जग्गा अधिग्रहण याःगु इलय् त्रिविविया फुक्क ख्यलय् किपूमितय्त प्राथमिकता बीगु जुइ धकाः सहमति याःगु खःसा आः वयाः उगु सहमतियात कार्यान्वयन याये कथं डा. महर्जनयात उपकुलपति नियुक्त याःगुलिं नं परिषदं लसता प्वंकूगु खः। त्रिभूवन विश्वविद्यालयय् भीसी नियुक्त जूम्ह वय्कः न्हापांम्ह किपूमि खः ।
