'नेपालभाषाया आन्दोलन' सफू विमोचन
येँ (सन्ध्या टाइम्स)/नेपाल लोकतान्त्रिक नेवाः संघया नायः सानुराजा शाक्यं च्वयादीगु सफू "नेपालभाषा आन्दोलन" व नेपाल लोकतान्त्रिक नेवाः संघया येँ जिल्लां पिथंगु ख्वाःपौ "नेवाः अभियान" नेकपा (एमाले) या उपाध्यक्ष वामदेव गौतम व जनकवि दुर्गालाल श्रेष्ठं उलेज्या यानादिल ।
लोकतान्त्रिक नेवाः संघ व आदिवासी जनजाति संरक्षण मञ्चया ग्वसालय् जूगु सफू विमोचन यासें वामदेव गौतमं नेवाः जातिया विश्लेषण यायेबलय् नेवाःतय्गु संस्कृति, वास्तुकला, खेतीपातीया नापं भाषायात विशेष महत्व बीमाः धयादिल। थौंया इलय् संघीयताय् मवनेगु धइगु न्ह्यसः हे मदु धासें वय्कलं संघीयताया मोडालिटी गथे जुइमाः धइगु विषय जक खः, गुगु खँय् विवाद मयासे स्थायित्व बी कथंया निष्कर्ष हयेमाः धयादिल ।
जनकवि दुर्गालाल श्रेष्ठं विमोचित सफू छगू ग्रन्थ जक मखुसें नेपालभाषा आन्दोलनया छगू महाग्रन्थ हे खः धयादिल। उगु सफू नेपालभाषाया आन्दोलनया छगू स्याच्चुगु दस्तावेज खः धासें वय्कलं थज्याःगु सफू च्वइपिं वैचारिक श्रष्टात दत्तले गुगुं नं कथंया सफू न्हंके मफइगु बिचाः प्वंकादिल ।
सफूया च्वमि सानुराजा शाक्यं सछिदँ न्ह्यवंनिसें नेवाःतय्सं याना वयाच्वंगु संघर्षयात संविधानय् लिपिबद्ध यायेगु तातुनाः थ्व सफू च्वयागु खः धयादिल। वय्कलं नेवाःतय्त थौं स्वायत्त जक दयां नं मगाः उगु स्वायत्त संविधान दुने सुरक्षित नं जुइमाः धयादिल ।
नेपाः राष्ट्रिय पार्टीया अध्यक्ष डा. केशवमान शाक्यं विमोचन जूगु सफू नेपालभाषा व नेवाः आन्दोलनया विषयय् जुयाच्वंगु छगू समीक्षात्मक मुना खः धयादिल।
आदिवासी जनजाति उत्थान राष्ट्रिय प्रतिष्ठानया प्रतिनिधि प्रदिप बज्राचार्यं २००७ सालंनिसें ततःधंगु स्वंगुलिं आन्दोलनय् नेवाःतय्गु सक्रिय भूमिकां हे जक सफल जूगु खःसां लिपा नेवाःतय्त लिउने लाका बिउगु खः धासें आः नेवाःतय्सं नं थःगु पहुँच अप्वयेकेगु कुतः यायेमाः धयादिल ।
ज्याझ्वलय् नेकपा (एमाले)या केन्द्रीय दुजः राजेन्द्र श्रेष्ठ, भाषासेवी त्रिरत्न शाक्य, लोकतान्त्रिक नेवाः संघ पूर्वाञ्चल शाखाया न्वकु सावित्री, पश्चिमाञ्चल क्षेत्रया न्वकु मदनकाजी श्रेष्ठ, नेपालभाषा मंकाः खलःया नायः पद्मरत्न तुलाधर, नेवाः ल्याय्म्ह न्ह्यलुवाया कजि नरेशवीर शाक्यपिनि नं उपस्थिति दुगु खः ।
ने.लो.ने. संघया न्वकु हरिकृष्ण व्यञ्जनकारया सभापतित्वय् जूगु उगु ज्याझ्वलय् आदिवासी जनजाति संघया दुजः रञ्जन मास्कें लसकुस यानादीगु खःसा सुमन श्रेष्ठं सुभाय् बियादीगु खः ।
