युवक बौद्ध मण्डल नेपालया न्हूधाः
यल (सन्ध्या टाइम्स)/युवक बौद्ध मण्डल नेपालया नीनिक्वःगु कार्यसमितिइ सुरेन्द्र शाक्य न्हूम्ह अध्यक्ष नियुक्त जुयादीगु दु। शनिवाः जूगु साधारणसभां वय्कःया नेतृत्वय् झिंन्याम्ह दुजः दुगु न्हूगु कार्यसमिति ल्यःगु खः। उकी शोभा शाक्य न्हापांम्ह व राजेश शाक्य निम्हम्ह उपाध्यक्ष जुयादीगु दुसा बुद्धरत्न शाक्य- महासचिव, अरमितारा बज्राचार्य-दांभरि, सुरेश बज्राचार्य-सचिव, प्रदिप बज्राचार्य- सहसचिव, सनम शाक्य-प्रचार सचिव, तीर्थरत्न शाक्य-उपप्रचार सचिव ल्यःगु दु ।
ज्याझ्वःया उलेज्या भिक्षु ज्ञानपूर्णिक महास्थवीरंयानाबिज्याःगु खः। शील प्रार्थना यासें न्ह्याकूगु उगु ज्याझ्वलय् संघ धर्मदेशना वसपोलं हे यानाबिज्याःगु खः ।
सभानायः नापं युवक बौद्ध मण्डलया नायः हेरारत्न शाक्यं नकतिनि हे श्रीलंकां पिकाःगु हुलाक टिकटय् लुम्बिनी भारतय् लाः धकाः च्वयातःगु खँया विरोध यायेमाःगु बिचाः प्वंकादिल। वरिष्ठ सल्लाहकारपिं पुलांम्ह मन्त्री बुद्धिराज बज्राचार्य व व पुलांम्ह मेयर बेखारत्न शाक्यपिंसं नं नुगःखँ तयादीगु खः ।
लोककीर्ति विहारय् जूगु उगु ज्याझ्वलय् सुरेन्द्र शाक्यं लसकुस यानादीगु खःसा धर्मोदय सभाया नायः बद्रीरत्न बज्राचार्य, महासचिव सुचित्रमान शाक्य, उपाध्यक्ष पद्मज्योति कंसाकार, यल महानगरपालिकाया प्रतिनिधि राजेन्द्रप्रसाद पौड्याल लगायत विशिष्ट पाहांपिनि उपस्थिति दुगु खः। ज्याझ्वलय् चर्या प्याखं नं क्यनेगु ज्या जूगु खःसा प्याखं न्ह्यब्वःपिं कलाकार व प्रशिक्षकपिंत सल्लाहकार बेखारत्न शाक्यं दसिपौ लःल्हानादीगु खः ।
