राज्य पुनर्संरचना बारे कांग्रेसय् न्ह्याःगु वहस

अन्ततः नेपाली कांग्रेसं नं राज्य पुनर्संरचनाया विषययात कयाः थःगु पार्टी दुने सहलह सुरु याःगु दु। पार्टीया केन्द्रीय बैठकय् राज्य पुनर्संरचना सम्बन्धी प्रस्ताव न्ह्यब्वयेगु ज्या जूगु दुसा आः उकियात कयाः नेतातय्सं बिचाः ब्याकेगु ज्या नं जूगु दु ।

संविधानसभाया म्याद निक्वः निक्वः थपे यायेधुंकाः आः थपे जूगु म्याद नं क्वचाये त्ययेकाः कांग्रेसं मुलुकया दकलय् विवादित जुयाच्वंगु विषय राज्य पुनर्संरचना बारे सहलह ब्याकूगु दु। कांग्रेसया थ्व ज्यां वास्तवय् राज्य पुनर्संरचना बारे थ्व पार्टी उत्सुक मजू धइगु खँ बांलाक हे क्यं। लिसें म्हिगः बैठकय् राज्य पुनर्संरचना सम्बन्धी थ्व प्रस्ताव गुम्ह नेतां प्रस्तुत यानादिल, वय्कःया ख्वाः स्वयेबलय् राज्य पुनर्संरचना बारे कांग्रेस उदार नं मजू धइगु क्यना बिउगु दु। नेपाली कांग्रेसय् रामचन्द्र पौडेल संघीय व्यवस्थाया विरोधी नेता कथं परिचित जू। उज्वःम्ह मनुखं राज्य पुनर्संरचनाया मुख्य प्रस्ताव पेश यानादीगुलिं वय्कः कांग्रेसं संघीय व्यवस्था प्रति अनुदार सन्देश सम्प्रेषण यानादीगु सीदु। थ्व इलय् मुलुकया हे दकलय् जीवन्त विषय जुयाच्वंगु मुद्दा धइगु राज्य पुनर्संरचना खः। थुकी अनुदार जुइगुया अर्थ अधिकार फ्वनाच्वंगु वर्गयात तम्वयेके बीगु व मुलुकय् हानं मेगु कथंया द्वन्द्व सिर्जना याके बीगु जू वनी गुगु माओवादीं झिदँ तक न्ह्याकूगु सशस्त्र द्वन्द्व स्वयां नं भयानक जुइगु खँय् शंका मदु। कांग्रेस छगू लोकतान्त्रिक पार्टी जूगु ल्याखं थ्व सुयातं अन्याय मयायेगु नीति ज्वनी धकाः सकस्यां आशा कयाच्वंगु दु। कांग्रेसं जनताया उगु आशायात यथार्थय् हिलेगु ज्या यायेमाः ।

More Stories Like this