वइगु भदौ १४ गते न्ह्यो हे सहमतिया सरकार संचारमन्त्री बोगटी

ये (झीगु स्वनिगः)

सूचना तथा संचार मन्त्री पोष्टबहादुर बोगटीं वइगु भदौ १४ गते न्ह्यो हे सहमतिया न्हूगु सरकार निस्वनीगु धाःगु दु । रिपोर्ट्स क्लब नेपाःया ग्वसालय् म्हिगः जूगु छगू साक्षात्कार ज्याझ्वलय् मन्त्री बोगटीं उगु खा धयादीगु खः । मन्त्री बोगटीं प्रधानमन्त्रीं ब्यूगु समयसीमा साउन २८ गते दुने हे सेना समायोजनया मोडालिटि, ल्याः, दर्जा व पुर्नस्थापनाय् वनीपिनिगु राहतया प्याकेज सहमति जूया ग्रुपिङया प्रक्रियाय् न्ह्योने वनीगु खाय् बहः वियादिल । नापं वय््कलं साउन २८ गते न्ह्यो हे छप्पा जुइगु मजूसें मुलभुत व महत्वपूर्ण विषयलय् सहमति जुयाः शान्तिप्रक्रिया न्ह्योने वनीगु धयादिल ।
मन्त्री बोगटीं शान्ति प्रक्रियाया मू विषयसं सहमति जुइवं प्रधानमन्त्रीं सहमतिया सरकारया नितिं ला चालिइगु धयादिल । ज्याझ्वलय् मन्त्री बोगटीं माओवादी उपाध्यक्ष डा. बाबुराम भट्टराईया नेतृत्वय् राष्ट्रिय सहमतिया सरकार दयेकीगु धापू तयादिल ।

सैद्धान्तिक कथं माओवादी नेतातय्सं कयाच्वंगु दोहोरो सुरक्षा अन्त्य जुइधुंकूगु धासें याकनं थुकिंया ब्यवहारिक कथं दोहोरो सुरक्षाया अन्त्य जुइगु नंं विश्वास यानादिल । शान्ति प्रक्रिया व संविधान निर्माणया विषयसं सहकार्य यानाः सहमतिइ वनेगुया विकल्प मदुगु धयादिल । श्रमजीवि पत्रकार ऐन कार्यान्वयनया लिपांगु चरणया जानकारी वियादिसें थुगू मन्त्री परिषदया बैठकं थुकियात कार्यान्वयन यायेत सम्बन्धी प्रस्ताव यंकीगु स्पष्ट यानादिल । प्रेस स्वतन्त्रता व प्रेसया सुरक्षाया नितिं फुक्क कथंया कुतः यायेगु नितिं न्ह्योने वनेत संचार माध्यमयात नापं जिम्मेवार जुया न्ह्योने वनेगु नितिं नं इनाप यानादिल ।