अन्ततः कांग्रेस राजधानी प्रदेशया लँपुइ

ये (झीगु स्वनिगः)

संघीयता व राज्य पुनर्संरचनाया सवालय् विचार शुन्य जुयाच्वंगु नेपाली कांग्रेस अन्ततः स्वनिगःयात राजधानी प्रदेश दयेकेगु लँपुइ वंगु दु । नेपाःमि जनतातय्सं चुनावय् भोट बियाः न्हूगु संविधान दयेकेगु नितिं सभासद्त ल्ययाः हःगु अले संविधानसभाया म्याद फुनाः निक्वः तक थप यानाः नं लिपांगु पटकय् थप याःगु म्याद नं लच्छि जक ल्यं दनिगु अवस्थाय् प्रमुख प्रतिपक्ष कांग्रेसया केन्द्रीय कमिटी दुने संघीयता व राज्य पुनर्संरचनाया सवालय् बहस सुरु जूगु दु । संविधानसभाया राज्य पुनर्संरचना नापं राज्य शक्ति बाँडफाँट समितिपाखें न्ह्यब्वःगु नेवाः प्रदेश नापं १४ प्रदेशया प्रस्तावयात तप्यंक हे अस्वीकार याइगु कथंया प्रस्ताव केन्द्रीय कमिटीइ यंकाः नेपाली कांग्रेस दुने सहलह ब्याकूगु दु ।

सामर्थता व पहिचानया आधारय् प्रदेशत दयेकेगु धकाः धाःसां नं अन्ततः कांग्रेस नेवाः स्वायत्त प्रदेशयात राजधानी प्रदेश दयेकेगु लँपुइ वनीगु संभावना अप्वया वःगु दु । बास्तवय् कांग्रेसं क्षेत्रीय स्वायत्तताया अवधारणा कथं अथे राज्य पुनर्संरचनाया विषययात कयाः सहलह ब्याकूगु खः धकाः तकं धयाहःगु दु । कांग्रेस दुने न्हापांखुसि संघीयता व राज्य पुनर्संरचनाया सवालय् बहस म्हिगः आइतवाःनिसें केन्द्रीय कमिटीइ जूगु खः । उगु मुँज्याय् कांग्रेसया उपसभापति नापं संसदीय दलया नेता रामचन्द्र पौडेलं अथे राजधानी प्रदेशया प्रस्ताव हयादीगु खः ।

उगु प्रस्तावय् राजधानी प्रदेश नापं यानाः खुगू प्रदेशया खँ न्ह्यथना तःगु दु । नेवाः प्रदेशयात राजधानी प्रदेश अले स्वनिगलंपिने खुगू प्रदेशया प्रस्ताव तयातःगु दु । नेता पौडेलया उगु प्रस्तावयात कयाः केन्द्रीय नेता नरहरि आचार्यं ब्याख्या यानादीगु खः धकाः कांग्रेसया छम्ह नेतां धयादीगु दु । आः थौं आइतवाः संघीयता व राज्य पुनर्संरचनाया विषययात कयाः सहलह ब्याकेगु याइ धकाः धाःगु दु । राज्य पुनर्संरचनाया झ्वलय् अथे नेवाः प्रदेशयात राजधानी प्रदेश धायेगु नापं संविधानसभाया राज्य पुनर्संरचना समितिं प्रस्ताव याःगु जाति, भाषा, पहिचानया आधारया थीथी प्रदेश वइगु जुल धकाः लय्तायाच्वंपिं आदिवासी, जनाजाति नापं राज्यं बहिस्करणय् लाकातःपिं समुदायया नेता व कार्यकर्तात कांग्रेसय् न्हय्गू प्रदेशया प्रस्ताव हयाः बहस याःगुलिं छगू कथं हीमी चाःगु दु धकाः स्वयं कांग्रेसया छम्ह नेतां जानकारी बियादीगु दु ।