कांग्रेसय् संघीयता बारे वहस
स्वनिगःयात राजधानी प्रदेश दयेकेगु प्रस्तावय् सहलह
येँ (सन्ध्या टाइम्स)/संविधानसभाया म्याद फुनाः निक्वः तक थप यायेधुंकूगु नापं लिपांगुखुसी स्वलाया म्याद थप याःगु नं आः लच्छि जक ल्यं दनिगु इलय् प्रमुख प्रतिपक्षी नेपाली कांग्रेसया केन्द्रीय कार्यसमितिइ न्हापांखुसी संघीयता व राज्य पुनर्संरचनाया बारे औपचारिक बहस सुरु जूगु दु। थौं च्वंगु केन्द्रीय बैठकय् राज्य पुनर्संरचना विषयय् बहस सुरु जूगु खः ।
बैठकय् पार्टीया उपसभापति नापं संसदीय दलया नेता रामचन्द्र पौडेलं सामर्थ्य व पहिचानया आधारय् स्वनिगलंपिने खुगू प्रदेश व स्वनिगःयात राजधानी प्रदेश दयेकेगु प्रस्ताव सहितया प्रतिवेदन पेश याःगु खः ।
पौडेलं संघीयता व राज्य पुनर्संरचनाया प्रस्ताव पेश यानादीवं पार्टी दुने बहस सुरु जूगु खँ केन्द्रीय नेता अर्जुन नरसिंह केसीं संचारकर्मीतय्त कनादिल। पौडेलं संघीयता व राज्य पुनर्संरचनाया सवालय् तयादीगु उगु प्रस्तावयात कयाः केन्द्रीय दुजः नरहरि आचार्यं थप ब्याख्या यानादीगु खः। नेता केसीं संघीयता व राज्य पुनर्संरचनाया सवालय् कन्हय्या बैठकय् हाकनं सहलह जुइ धयादिल ।
अथे हे प्रधानमन्त्री झलनाथ खनालं संसदय् वयाः राजीनामा बीगु प्रतिबद्धता प्वंकादिल धाःसा आः कांग्रेसं अबरुद्ध यानाच्वंगु संसद हानं चले याके बीगु खँ नं धाःगु दु।
थ्व हे दथुइ कांगेस केन्द्रीय कमिटीया बैठकं बैठकं क्यासिनोया समस्या समाधानया नितिं केन्द्रीय दुजः नविन्द्रराज जोशी, धनराज गुरुङ व शंकर भण्डारी दुथ्याःगु छगू कार्यदल दयेकूगु दु। उगु कार्यदलं नेपाल ट्रेड युनियन कांग्रेस (स्वतन्त्र) नाप सहलह ब्याकाः माःकथं समन्वय यानाः प्रतिवेदन तयार याइ धाःगु दु। छुं छुं क्यासिनोपाखें सरकारयात पुलेमाःगु राजश्व व कर मपूगुलिं पर्यटन मन्त्रालयपाखें क्यासिनो बन्द याःगु खः ।
बैठकं सुनसरीया देवागञ्जय् वंगु साउन १३ गते पार्टीया सक्रिय सदिस्य सानु यादव सुरक्षाकर्मीया गोलीं कयाः सीगु घटनायात घोर भर्त्सना याःगु दु। सामान्य घटनाय् हे सुरक्षाकर्मीं गोलीं कयेकाः कांग्रेस कार्यकर्तायात स्याना बिउगु ठहर यासें पार्टीं उकिया घोर भर्त्सना याःगु खः ।
