थौं लिम्बुवानया हाकुगु न्हि
येँ (सन्ध्या टाइम्स)/पृथ्वीनारायण शाहं थःगु राज्य विस्तारया झ्वलय् लिम्बुवानवासीतय्त झंगः लानाः थःगु राज्य दुने विलय याःगु न्हि थौं हे लानाच्वन। थ्व न्हियात लिम्बुवान प्रान्तीय परिषदं हाकुगु न्हि कथं हनेगु याना वयाच्वंगु दु। थ्वहे हाकुगु न्हिया लुमंतिइ परिषदं थौं लिम्बुवान बन्द याःगु दु ।
वि.सं. १९३१ साउन २२ गते अर्थात थौंया हे न्हि कुन्हु लिम्बुवान राज्ययात पृथ्वीनारायण शाहं एकात्मक राज्यय् दुथ्याकूगु खः। आः संघीय लोकतान्त्रिक गणतन्त्र नेपाः घोषणा जुइधुंकूगु अवस्थाय् लिम्बुवान राज्य हानं स्थापना यायेमाःगु नापं क्वःछिनातःगु इलय् हे न्हूगु संविधान जारी यायेमाःगु माग यासें राष्ट्रिय जनमुक्ति पार्टीनाप सतीगु लिम्वुवान प्रान्तीय परिषदं लिम्बुवान बन्द आह्वान याःगु खः। परिषदं दँय्दसं थौंया दिंयात लिम्बुवानया हाकुगु न्हि धकाः न्यायेका वयाच्वंगु खः ।
परिषदं अरुण पूर्वया गुंगू जिल्ला धनकुटा, मोरङ, सुनसरी, झापा, इलाम, पांचथर, तेह्रथुम व संखुवासभायायात लिम्बुवान दुने हे लाकेमाः धकाः माग याना वयाच्वंगु दुसा थौंया बन्दय् थ्व गुंगू जिल्ला नं प्रभावित जूगु दु ।
कांग्रेसपाखें सुनसरी बन्द
थ्व हे दथुइ छुं दिं न्ह्यः जक सुनसरीया देवानगञ्जय् प्रहरीया गोलीं कयाः सीम्ह सोनु यादवयात सहिद घोषणा यायेमाःगु व पीडितयात क्षतिपूर्ति बिइमाःगु माग यानाः थौं नेपाली कांग्रेसं सुनसरी जिल्ला बन्द आह्वान याःगु दु।
नेपाली कांग्रेसया जिल्ला समितिं सुनसरी जिल्ला बन्द याये न्ह्यः म्हिगः बहनी जिल्लया सदरमुकाम इनरुवा, इटहरी, दुहवी व देवानगञ्ज लागाय् मसाल जुलुस पिकाःगु खः ।
