त्रिविविया भवन कब्जा
किपू (सन्ध्या टाइम्स)/त्रिविविइ किपूमितय्गु अग्राधिकार दयेमाःगु माग यासें आन्दोलन याःगु इलय् खाली जूगु क्वाटरय् नेवाः स्वायत्त राज्य मंकाः परिषद किपुलिं म्हिगः नेवाः स्वायत्त राज्यया ध्वाँय् ब्वयेकाः कब्जा याःगु दु। नापं आः उगु क्वाटरय् मंकाः परिषद्या ज्याकू तयेगु घोषणा नं याःगु खः। माओवादीया सांसद् नापं परिषद्या सल्लाहकार दिलीप महर्जनया प्रमुख आतिथ्यय् अन नेवाः ध्वाँय् ब्वयेकेगु ज्या जूगु खः। वय्कलं त्रिविइ किपूमितय्गु हक अधिकारया निंतिं निरन्तर रुपं आन्दोलन यायेमाःगु खँय् बः बियादिल। ज्याझ्वलय् मंकाः परिषद् नायः पुचःया कजि नापं पञ्चलाल महर्जन व कृष्णहरी महर्जनपिंसं आन्दोलन बारे न्ववानादीगु खः ।
