थनिंनिसें सार्वजनिक थासय् चुरोस त्वने मंत
येँ (सन्ध्या टाइम्स)/सार्वजनिक थासय् चुरोस त्वनीपिंत ज्वनाः बं पुइकेगु कानून थौं श्रावण २२ गते आइतवाः निसें लागू जूगु दु। थनिंनिसें थ्व ऐन लागू जुइगु जुयाः थुकिया बारे जनचेतना थकायेगु ताः तयाः वंगु विहीवाःनिसें देय्न्यंकं प्रचार व दवाव बीगु ज्या नं सुरु जूगु दु। 'नेपाल मदिरा नीति सञ्जाल र सूर्ती नियन्त्रण दवाव समूह'पाखें थ्व प्रचार अभियान सुरु याःगु खः ।
वंगु विहीवाः बसन्तपुली छगू ज्याझ्वःया दथुइ सभामुख सुभाष नेम्बाङं उगु अभियान आरम्भ यानादीगु खः। सभामुख नेम्बाङपाखें अभियान सुरु जूगु घोषणा यानादीवं दवाव समूहया करिब प्यसःम्ह कार्यकर्तातय्सं छेँखा व पसः कवलय् दुहां वनाः चुरोस विरोधी पर्चा इनेगु ज्या याःगु खः। थ्व प्रचार अभियानय् देय्न्यंकंया ७०० गू सामाजिक संघ संस्थात लगे जुयाच्वंगु खँ अभियान कार्यक्रमया संयोजक सुम्निमा तुलाधरं कनादिल ।
थनिंनिसें लागू जूगु सूर्तीजन्य पदार्थ तथा धुम्रपान नियन्त्रण र नियमन ऐन अन्तर्गत सार्वजनिक थासय् चुरोस त्वनीपिं वा मीपिंत सछि तकांनिसें छगू लाख तका तक बं पुइकीगु प्रावधान दु। थ्व ऐनय् सूर्तीया विज्ञापन तथा प्रायोजन व सूर्ती सम्बन्धी सुचं छुं नं सञ्चार माध्यमं प्रवाह याये मदइगु, १८ दँ क्वय्यापिंत व प्वाथय् दुपिं मिस्तय्त सूर्तीजन्य पदार्थ मी मदइगु, शिक्षण तथा स्वास्थ्य संस्था, बालकल्याण गृह, शिशु स्याहार केन्द्र, वृद्धाश्रम, अनाथालयया १०० मिटर जःखः लाःगु छेँ वा पसलं सुर्तीजन्य पदार्थ मी मदइगु प्रावधान नं दु ।
