राज्य पुनर्संरचना मदुगु अपूर्ण संविधान
पार्टीतय् आन्तरिक कचवनं यानाः हानं छक्वः इलय् संविधान जारी याये फइगु सम्भावना खने मदयेवं संविधानसभाया तःधंगु स्वंगू दलं राज्य पुनर्संरचना दुमथ्याःगु संविधान जारी यायेगु कुतः यानाच्वंगु खँ पिहां वःगु दु। उकी उमिसं न्हापां राज्य पुनर्संरचना दुमथ्याःगु संविधान जारी यायेगु व वयां लिपा हानं मेगु सरकार गठन यानाः राज्य पुनर्संरचनाया ज्या क्वचायेकेगु धकाः ज्याझ्वः दयेकूगु दु ।
राज्य पुनर्संरचना दुमथ्याकुसे संविधान जारी यायेगु धकाः न्हापा नं खँ पिहां वःगु खः। तर उकियात देय्या जनजातितय्सं स्वीकार मयाः। उकिं छुं ई अन्तराल दयेकाः वहे तयारी यानाच्वंगु दु। थ्व धइगु वास्तवय् आः राज्य पुनर्संरचनाया ज्यायात फासांफुुसुं याना छ्वयेगु हे कुतः खः। आः तयार याःगु प्रस्तावय् नं न्हापां राज्य पुनर्संरचना मदुगु संविधान जारी यायेगु व वयां छुं ई लिपा राज्य पुनर्संरचना यायेगु धकाः खँ न्ह्यथनातःगु दु। यदि संविधान जारी यायेगु व राज्य पुनर्संरचनाया ज्या सम्पन्न यायेगुया दथुइ 'छुं ई' जक हे ग्याप जुइगु खःसा थ्व नितां नापनापं यायेत छु आपत्ति जुल? स्वदँ स्वदँ मछि ला संविधान बी लिकायेधुंकल धाःसा मेगु 'छुं ई' लिबाकां छु पाइ? थथे यानाः थःपिनि बेइज्जत जुइ धकाः नेतातय्सं मतायेकूसां जिउ। वय्कःपिंके आः बेइज्जत जुइगु लागिं छुं ल्यं नं मदये धुंकल। अय् जूगुलिं नेतातय्सं राज्य पुनर्संरचना उल्लेख मयासे संविधान जारी यायेगु धाःगु खँयात जनतां स्वीकार याये फइ मखु। थःत माःगु वस्तु हे मतसे संविधान बीगुया अर्थ संविधान मबीगु हे खः। अज्याःगु संविधान जनतायात म्वाः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
