आःयात संघीयता मदुगु संविधान

संविधान जारी यायेगु स्वंगू चरणया रोडम्याप

येँ (सन्ध्या टाइम्स)/संविधानसभाया तःधंगु स्वंगू दल माओवादी, कांग्रेस व एमालेया शीर्ष नेतात राज्य पुनर्संरचना मदुगु संविधान जारी यायेत सहमत जूगु दु ।

स्वंगू दलया शीर्ष नेतात आःयात विवादय् लानाच्वंगु राज्य पुनर्संरचनाया खँयात थाति निं तयाः जूसां संविधान जारी यासें न्ह्यःने न्ह्याः वनेगु खँय् सहमत जूगु खः। उकिया लागिं आः गय् यानाः पलाः छीगु धकाः प्रधानमन्त्री झलनाथ खनालं छगू रोडम्याप नापं तयार यायेधुंकूगु खँ सूत्रं धाःगु दु ।

प्रम खनालं सरकार संचालनया निंतिं स्वंगू चरणया छगू रोडम्याप दयेकूगु दु। गुकी भदौ १४ लिपा हानं छक्वः संविधानसभाया म्याद थपे यानाः स्वंगू पार्टीं पालंपाः सरकार चले यायेगु प्रस्ताव दुथ्याः ।

उगु प्रस्तावय् आः वइगु मंसीर १४ गते तकया दुने राज्य पुनर्संरचना दुमथ्याःगु संविधान जारी यायेगु, अनं लिपा खुलांनिसें गुला तका दुने राज्य पुनर्संरचनाया मुद्दायात पूवंकेगु व गणतन्त्रयात संस्थागत यायेगु। अले थ्व धुंकाः खुलांनिसें गुला तकया दुने न्हूगु चुनाव यानाः न्हूगु सरकार गठन यायेगु धइगु खँ दुथ्याः। थ्व स्वंगू ज्या (संविधान जारी, राज्य पुनर्संरचनायात पूर्णता व न्हूगु चुनाव) स्वंगू तःधंगु दलया स्वंगू हे सरकारं अलग अलग यायेगु खँ नं प्रम खनालया प्रस्तावय् दुथ्याः। खनालया उगु प्रस्तावयात माओवादी अध्यक्ष प्रचण्ड व नेकां नेता रामचन्द्र पौडेलं सकारात्मक रुपं काःगु खँ सूत्रं धाःगु दु। थुकी सुनां न्हापां सरकार चले यायेगु धइगु विवाद मदुगु खँ नं सूत्रं धाःगु दु ।

प्राविधिक पुचःलिसे सहलह
स्वंगू तःधंगु दलया शीर्ष नेतातय्सं थौं सुथय् सेना समायोजन विशेष समिति अन्तर्गत प्राविधिक पुचःलिसे सेना समायोजनया मोडालिटी बारे सहलह ब्याकल। उगु सहलह लिपा नेकां नेता रामचन्द्र पौडेलं प्राविधिक पुचःया दुजःतलिसे माओवादी लडाकुतय्गु पुनर्वगीकरण बारे जानकारी कायेगु ज्या जूगु खँ सञ्चारकर्मीतय्त कनादिल। समायोजनया मोडालिटी बारे राजनीतिक तहपाखें हे निर्णय जुइगु खँ नं वय्कलं धयादिल। साढे १ घण्टा जूगु उगु सहलहय् विशेष समिति सचिवालया प्रमुख बालानन्द शर्मां विशेष सचिवालयपाखें याःगु ज्याया प्रगति विवरण पेश यानादीगु खः ।