मधेसवादीया स्वंगू सर्त खनाः नेतात थारान्हुल
येँ (सन्ध्या टाइम्स)/नेपाःया न्हूगु संविधानय् संघीयता व राज्य पुनर्संरचनाया सवालय् मधेसवादी दलतलिसे लगातार रुपं सहलह ब्याकाच्वंपिं मू मू स्वंगू दलया शीर्ष नेतात मधेसी नेतातय्गु स्वंगू सर्त खनाः थारा न्हूगु दु ।
विशेष यानाः नेपाली कांग्रेसं अडान कयाच्वंगु राज्य पुनर्संरचना आयोगया सवालयात कयाः म्हिगः संयुक्त लोकतान्त्रिक मधेसी मोर्चाया नेतातय्सं राज्य पुनर्संरचना आयोगयात संविधानसभाया राज्य पुनर्संरचना समितिं तयार याःगु १४ प्रदेशया प्रस्तावयात हीके फइगु अधिकार बीगु, संघीय व्यवस्थाया ग्यारेन्टी यायेगु व फुक्क मधेस एक प्रदेशया ग्यारेन्टी बीगु धइगु स्वंगू सर्त न्ह्यःने तःगु खः। यदि स्वंगू दलं थ्व सर्त स्वीकार यायेगु खःसा थःपिं आयोग दयेके बीत तयार दु धकाः मधेसी नेतातय्सं धायेवं माओवादी अध्यक्ष प्रचण्ड, नेपाली कांग्रेस संसदीय दलया नेता रामचन्द्र पौडेल व प्रधानमन्त्री झलनाथ खनाल झस्के जूगु खः ।
राज्य पुनर्संरचना नापं राज्यशक्ति बाँडफाँट समितिं मधेसयात मधेस प्रदेश, नारायणी प्रदेश व थारुहट प्रदेश कथं स्वंगू टुक्रा यानाः प्रस्ताव यानातःगुयात विरोध यासें फुक्क मधेस छगू प्रदेश जुइमाः धयाच्वंपिं मधेसवादी दलया नेतातय्गु उगु सर्त न्ह्यःने वयेवं विशेष यानाः आयोगया खँय् अडान कयाच्वंम्ह कांग्रेसया नेता पौडेल अजूचाःगु खँ सूत्रं धाःगु दु। बैठकय् मधेसवादी नेतातय्सं संघीयता (राज्य पुनर्संरचना)या खँ दुमथ्याकुसे संविधानया एकीकृत मस्यौदा तयार यात धाःसा उकियात थःपिंसं गुगुं नं हालतय् नं स्वीकार मयायेगु ख्याच्वः नं बिउगु दु। संघीयतायात थाति तयाः संविधान तयार यायेगु ज्या जुयाच्वन धकाः मन्त्री घनश्याम भूषालं न्ववाःगु खँयात कयाः नं मधेसवादी नेतातय्सं बैठकय् न्ह्यसः तःगु खःसा प्रधानमन्त्री झलनाथ खनालं व खँ मन्त्री भूषालया व्यक्तिगत बिचाः जक खः धकाः टरे यानादीगु खः ।
बैठकय् माओवादी अध्यक्ष प्रचण्ड व प्रधानमन्त्री एवं एमाले अध्यक्ष खनालं मधेसवादी व कांग्रेसया दथुइ राज्य पुनर्संरचनाया सवालय् छु खँय् सहमति जुइ उकियात स्वीकार यायेत तयार दु धयादीगु खः ।
