इटहरीइ बम मुल, उदयपुरय् बम लुल
येँ (सन्ध्या टाइम्स)/इटहरीया नेपाल विद्युत प्राधिकरण ज्याकुथी थौं सुथय् बम मूगु दु। उगु प्रेसर कुकर बमं प्राधिकरणया छेँ सामान्य क्षति जूगु दु। बम विस्फोटया जिम्मा स्थानीय जातीय सम्बद्ध मोर्चां काःगु दु। उगु मोर्चां लिपांगु इलय् पूर्वया थीथी थासय् बम मुइका वयाच्वंगु दुसा विद्युत प्राधिकरणया ज्याकू नापं यानाः इटहरीइ जक प्यक्वः बम मुइकेधुंकूगु दु ।
मेखे उदयपुरया जिल्ला बन कार्यालयय् नं थौं सुथय् शक्तिशाली बम लुयावःगु दु। उगु ज्याकू दुहां वनेथाय् लाक्क हाकुगु प्लास्टिक झोलाय् उगु बम तयातःगु लुइकूगु खः। बम लुइवं अन नेपाली सेनाया बम डिस्पोजल पुचः थ्यनेधुंकूगु दु। खम्बुवान मुक्ति मोर्चा संयुक्तं पत्रिकाया ज्याकुथी फोन यानाः थुकिया जिम्मेवारी काःगु दु ।
