एमालें थःगु क्षमता व सामर्थ्य म्हसीके माल

प्रधानमन्त्री झलनाथ खनालं माओवादीं सिफारिस याना हःपिं मन्त्रीतय्त सपथ ग्रहण याकूगु खँयात कयाः प्रम खनालया पार्टी एमाले दुने तःधंगु विवाद पिहां वःगु दु। थुकियात कयाः पार्टी दुने तःधंगु हे मुद्दा दयेकेगु व फुसा प्रम खनालयात सरकारं लित सःतेगु थेंज्याःगु तयारी तकं याना हःगु समाचारत पिहां वयाच्वंगु दु। यदि एमाले दुने थज्याःगु छुं कथंया पलाः न्ह्यात धाःसा उकिं तःधंगु हे विवाद पिकाइगु खँय् शंका मदु ।

देय्या वर्तमान राजनीतिक सन्दर्भय् एमाले छगू अज्याःगु पार्टी खः गुकिं निगू अतिया दथुइ च्वनाः सन्तुलनया भूमिका म्हिता वयाच्वंगु दु। माओवादी व नेपाली कांग्रेसया थवंथवय् मिले मजूगु बिचाःयात दथुइ च्वनाः समायोजन यायेगु ज्या एमालें यानाच्वंगु दु। एमालेया थज्याःगु भूमिका थ्व इलय् झन् हे महत्वपूर्ण जुयाच्वंगु दु। तर एमालें आः म्हितेमाःगु थज्याःगु महत्वपूर्ण भूमिकायात छखे त्वःताः सरकारं सुयात सपथ ग्रहण याकल धइथेंज्याःगु चीधंगु विवादय् तक्यनाः दायित्व ल्वःमंकूगु खने दत। सरकारय् जुइगु थज्याःगु छगू निगू ज्याखँयात कयाः एमाले तक्यना च्वनेगु धइगु एमालेया धाथेंया क्षमताया दुरुपयोग व ई सितिकं छ्वय्गु ज्या जक खः। देशयात थौं जुयाच्वंगु धाथेंया संकटपाखें मुक्त यायेगु क्षमता व सार्मथ्य दुगु एमालें थौं थज्याःगु अनावश्यक विवादय् तक्यनाः थःगु धाथेंया शक्तियात हे म्हसीके मफयाच्वंगु खनेदु। एमाले व थुकिया नेतात अज्याःगु चीधंगु विवादं थहां वयाः मुलुकयात सही निकास बीगु लँपुइ न्ह्याः वयेमाःगु खनेदु। देशं एमालेया उगु भूमिकाया अपेक्षा यानाच्वंगु दु ।

More Stories Like this