न्हूगु निभाः न्हूगु नेपाः

बिमल ताम्राकार
थ्व प्यकालँया दुवाः खः । गन लँ पंक दथुइ लाक्क ल्वहं थांया दु । उकिइ द्यने छगू झवाता थनातःगु दु । झवाताया छ्यनय् कल्कि तपुलि, खवगु ल्हाःतय् तरवार व जव ल्हाया च्वलापतिंचा थना लिस्वकातःगु दु ।

थौं व थासय् आकाझाकां मनूत ग्वाराग्वारा दासि वयाच्वंगु दु । ह्याउँगु ध्वाँय्या लबु दनाच्वंगु दु । निसः व स्वीन्हय्दँ न्ह्यवनिसें पतिमतिचिंक क्वत्यलातःगु विरुद्धया उकुस मुकुस, पित्याः, प्याःचाः, स्याःचाः, स्याः ख्वाःख्वालय् लेहेँलेहेँ पुयाच्वंगु दु । सर्गः हे झिरिक्क गुनावइ थें च्वंक थीथी नाराया सः थ्वयाच्वन ।

राजतन्त्र - मुर्दावाद !
लोकतान्त्रिक गणतन्त्र नेपा - जिन्दावाद !
न्हूगु नेपाः दयेके नु - दयेके नु, दयेके नु !

अन छत्थुं बिचाःया आलाउलु सनाहल । अन स्याये पालेया लकस ब्वलनावल । छु याये गथे यायेया भावया दथुइ छम्ह मनू ल्वहंथां गयाः थाहांवन । सः तिस्सः जुयावल ।

- का का ! लाकि लाकि थ्व झतिंगराया ल्हातय् च्वंगु तरवार !

व मनुखं तरवार लिना वांछ्वयाहल । बँय् मजुनिबलय् त्वःधुला धूधू जुल । झवाता सुम्क तुं । झवाताया ख्वालय् छुं ह्यूपाःया चिं खनेमदु ।

- का का ! थ्वया कल्कि तपुलि नं त्वकि !
अथे खँपु ल्हाना मेचु हे दिइमलानि कल्कि तपुलि नं नैक्यालं लुइ थें वांछ्वयाहल । बँय् मजूबलय् लाछालुछु जुया चुंचुं दन । झवाताया ख्वाःया उं ब्वया भतिचा भुइसे च्वन । छत्थुं न्हाचयागु तुं नारा लिथ्वयेकल ।

राजतन्त्र - मुर्दावाद !
लोकतान्त्रिक गणतन्त्र नेपा - जिन्दावाद !
न्हूगु नेपाः दयेके नु - दयेके नु, दयेके नु !
हानं मेगु छगू सः थ्वयावल ।

- थ्वयागु धस्वाःगु पतिंचा नं त्वःथुलाछ्व ।
थ्व सः जक झवाताया न्हाय्पनं दुहां वनेवं वया मिखां धर्र्रर्र ख्वबि हाल । झवाता सि (मैन) थें नाइयावन । झवाता पुलिं चूवन । अले जनतातय् न्ह्यःने अथें क्वछुनाः भ्वसूवन ।

मनूतय् ग्वाराग्वारा दासि बुलुहुँ फःहिलाः न्ह्यज्यानावन । चकंगु कुलांपाखे न्हूगु निभाः न्हूगु नेपाः लुइकेत ।

More Stories Like this