केन्द्रीय बैठकया अध्यक्षता उपाध्यक्षयात याकेगु ग्वसाः
येँ (सन्ध्या टाइम्स)/वइगु २८ गतेया दुने शान्ति प्रक्रिया ठोस रुपं न्ह्याः मवन धाःसा राजीनामा बी धयादीम्ह प्रधामन्त्री झलनाथ खनालयात २१ गते हे सरकारं लित सःतेगु नितिं एमाले नेता माधव नेपाल व केपी ओली पक्षं कुतः यानाच्वंगु खँ सीदुगु दु। कंस २१ गते च्वनीगु एमाले केन्द्रीय कमिटीया बैठकं हे प्रम खनालयात राजीनामा बीकाः सरकारं लित सःतेगु निर्णय यायेत माधव-ओली पक्ष थौंकन्हय् सक्रिय जुयाच्वंगु दु ।
प्रम खनालं माओवादीया मन्त्रीतय्त सपथ ग्रहण याकेगु विषययात कयाः जूगु स्थायी समितिया बैठकय् अध्यक्ष खनाल विवादय् लाये धुंकूगु कारणं आः च्वनीगु बैठकया अध्यक्षता नं पार्टीया उपाध्यक्षपिंत याकेमाः धइगु सः माधव-ओली खेमां थ्वयेका हःगु दु। आः च्वनीगु बैठकया अध्यक्षता उपाध्यक्ष विद्या भण्डारी अथवा अशोक राई मध्ये छम्हेसित याकेगु व उगु हे बैठकं पार्टी अध्यक्ष खनालयात कारवाही यायेगु तयारी समेत नेपाल-ओली पक्षं यानाच्वंगु खँ सूत्रं धाःगु दु ।
पार्टीया बरिष्ठ उपाध्यक्ष बामदेव गौतम खःसां वय्कः अध्यक्ष खनाल पक्षधर जूगुलिं वय्कःया अध्यक्षताय् बैठक च्वंसां नं थःपिंसं धाः थे जुइगु सम्भावना मदुगुलिं वय्कः स्वयां कनिष्ठकपिं उपाध्यक्षपिंत बैठकया अध्यक्षता याके माःगु माग माधव केपी पुचलं यानाच्वंगु खँ सूत्रं धाःगु दु ।
वंगु छुं दिं न्ह्यः जक च्वंगु स्थायी समितिया बैठकय् माधव ओली पक्षं माओवादीया न्हूपिं मन्त्रीतय्त सपथ ग्रहण मयाकेगु कुतः याःगु खःसां प्रम खनालं सपथ ग्रहण याकेगु धइगु प्रधानमन्त्रीया विशेषाधिकार खः धासें सपथ ग्रहण याकेगु ज्या जूगु खः। नापं २१ गते केन्द्रीय कमिटीया बैठक च्वनाः उगु बैठकं छु निर्णय यात उकियात स्वीकार यायेगु धकाः वय्कलं पार्टीयात धयादीगु कारणं नं २१ गतेया केन्द्रीय बैठकय् हे थःपिनि बहुमत खाकाः प्रमयात सरकारं लित सःतेगु कुतः माधव-ओली पुचलं यानाच्वंगु सूत्रया दावी दु ।
