बम भण्डारय् विष्फोट, स्वम्ह घाःपाः
येँ (सन्ध्या टाइम्स)/छगू सशस्त्र पुचलं थःपिनि ल्वाभः व बम थेंज्याःगु पदार्थ भण्डारण यानातःगु छेँय् बम मुयाः स्वम्ह मनू घाःपाः जूगु दु। सुनसरीया बबिया गाविस वडा नं. ३ या रामेश्वर मेहताया छेँय् वंगु चान्हय् शक्तिशाली बम मूगु खः। उकी लानाः बम तयेगु लिकायेगु ज्या यानाच्वंपिं निम्ह नापं स्वम्ह मनू घाःपाः जूगु खः ।
सुनसरीया सदरमुकाम नापं स्वानाच्वंगु उगु छेँय् बम मूगु खः। घटना लिपा प्रहरीं विष्फोटक पदार्थ भण्डारण यानातःगु आशंकाय् छेँ लगायत मेपिं निम्ह मनूयात नियन्त्रणय् काःगु दु। विष्फोट जूगु छेँय् मेगु नं बम दयेमाः धइगु आशंकाय् प्रहरीं छेँ छखां घेराबन्दी यानातःगु दु ।
उगु विष्फोटय् लानाः छेँथुवाः मेहताया छय् श्याम मेहता, स्थानीय नारायण मेहता व सुनसरीया श्रीपुर गाविस वडा नं. ३ या मोसगिर घाःपाः जूगु खः। उकी मध्ये श्याम व मोसगिर बम मिले यायेगु ज्या यानाच्वंपिं खः। थुपिं निम्हं अन च्वनाः बम दयेकेगु, ल्वाभः व बारुद मुंकेगु ज्या यानाच्वंपिं खः धइगु पत्ता लगे जूगु दु। उगु विष्फोटय् लानाः घाःपाः जूपिं स्वम्हेसितं प्रहरी नियन्त्रणय् विराटनगरया न्युरो अस्पतालय् वासः याकेगु ज्या जुयाच्वंगु दु। थौं सुथंनिसें उगु छेँय् नेपाली सेनाया बम डिस्पोजल पुचः वयाः मेगु बम लुइ ला धकाः मालेगु ज्या यानाच्वंगु दु ।
तराई लागाय् सशस्त्र संघर्ष याना वयाच्वंगु थीथी पुचःत मध्ये गुगुं छगू पुचलं उगु छेँय् बम व मेमेगु ल्वाभः भण्डारण यायेगु ज्या याना वयाच्वंगु जुइमाः धइगु अनुमान याःगु दु ।
