छपु चुरोसं छगू लाख बं पुले मालेफु !
येँ (सन्ध्या टाइम्स)/चुरोसया टलटल जुल धायेवं तुं आः न्ह्यःनेलाःथाय् चुरोस च्याकादीमते। छपु चुरोसं छितः छगू लाख तका तक बं पुइकाबी फु ।
थ्वहे वइगु आइतवाःनिसें नेपालय् हे न्हापांखुसी सार्वजनिक थासय् धूम्रपान यायेगु व न्याये-मीगु ज्या याये मदइगु ऐन लागू यायेत्यंगु दु। थ्व ऐन लागू जुइवं गनं नं सार्वजनिक थासय् चुरोस त्वनाच्वंगु वा मियाच्वंगु खन धाःसा वयात ज्वनाः सछि निसें छगू लाख तका तक बं पुइकेगु अधिकारयात स्थानीय प्रशासकयाके दइ ।
सार्वजनिक थाय् धायेबलय् सरकारी ज्याकू, संस्थान, स्कूल कलेज थेंज्याःगु शिक्षण संस्था, सफूकुथि, विमानस्थल, सार्वजनिक शौचालय, फिल्म हल, नाचघर आदि थेंज्याःगु सांस्कृतिक केन्द्र, होटल, भोजनालय, चिया पसः, छात्र तथा छात्रावास, रंगशाला, सार्वजनिक सवारी प्रतिक्षालय आदि थेंज्याःगु थाय्त लाइ ।
संसदं वंगु चैत्र २८ गते सूर्ती नियन्त्रण तथा नियमन ऐन पारित याःगु खःसा राष्ट्रपति डा. रामवरण यादवं वंगु २०६८ वैसाख १५ गते उकी लालमोहन तयादीगु खः। थ्व ऐन कार्यान्वयन जुल कि सार्वजनिक थासय् धूमपानय् पूर्ण बन्देज जुइ ।
