भिक्षुणीयात गुम्बाय् दुकाल
येँ (सन्ध्या टाइम्स)/बस दुने बलात्कारया शिकार जूम्ह बौद्ध भिक्षुणीयात फम्पिया वय्कःया पुलांगु हे गुम्बाय् प्रवेश याकूगु खः। बलात्कार लिपा गुम्बापाखें वय्कःयात 'अपवित्र जुल' धासें गुम्बाय् दुमकायेगु खँ पित हःगु खःसां लिपा थीथी बौद्ध संस्थाया दवावय् वय्कःयात हानं प्रवेश याकूगु खः ।
थनया शिक्षण अस्पतालय् वासः याकातःम्ह वय्कः मंगलवाः डिस्चार्ज जुयाः फम्पिया गुम्बाय् हे च्वं झाःगु खः। वय्कःयात नांजाःम्ह गायिका आनी छोइङ्ग डोल्माया पहलय् पुनः गुम्बाय् तयेगु ज्या जूगु खः ।
अस्पतालं डिस्चार्ज जूसां वय्कः पूर्ण रुपं धाःसा अझ नं स्वस्थ मजूनिगु खँ वय्कःया कका सूर्यबहादुर तामांगं 'सन्ध्या टाइम्स'यात कनादिल। वय्कलं सामान्य खँल्हाबल्हा याःसां अप्वः ई मौन हे च्वनादी ।
