द्यनाच्वंपिं निम्ह मस्तय् अपहरण

पर्वत जिल्लाय् वंगु निन्हु न्ह्यः छगू लाख तका दांया लागिं छम्ह स्थानीय मनूया निम्ह म्ह्याय्पिं अपहरण याना यंकूगु घटनां पर्वत जक मखु मुक्कं देय्यात स्तब्ध याना बिउगु दु। सुनसान छेँय् नकाब पुनाः दुहां वःपिं थ्व मनूतय्सं छगू लाख तका दां माग यासें द्यनाच्वंपिं निम्ह अवोध मस्तय्त उकथं अपहरण याना यंकूगु खः। निन्हु तक नं मस्त व अपहरणकारी पत्ता लगे मजुसेंलि सकलें चिन्तित जुइगु स्वाभाविक जुल ।

अपराधी मालेगु ज्याय् प्रहरीं तुरुन्त हे छुं प्रगति याइ धकाः आशा कायेगु थाय् मदु। उकिया लागिं प्रहरीयाके जाँगर जक मखु माःगु साधन तकं मदु। देशय् नेतात धाःसा प्रहरीया हाकीम जुइम्ह मन्त्री हिलेगु ज्याय् निं दकलय् व्यस्त खनेदु। प्रहरीया निरिहतां सर्वसाधारण मनूतय् जीवन गुलि असुरक्षित जुयाच्वन धइगु खँय् ध्यान बीगु फुर्सद नेतातय्के मदु ।

पर्वतया उगु घटनां अपराधीतय्के आः समाज व राज्यया गुलि तक डर धइगु मदयेधुंकल धइगु बांलाक हे क्यना बिउगु दु। उमिसं मात्र छगू लाख तकाया लागिं मस्त अपहरण याःगु कारणं उपिं पेशेवर मखु जुइमाः धइगु अनुमान दु। पेशेवर मखुपिं मनूतय्के हे थुलि आँट पिहां वइगु व अज्याःपिं मनूतय्त तकं ज्वनेगु ह्याउ राज्ययाके मदुगु स्वयेबलय् धाथें पेशेवर अपराधीतय्सं थ्व देशय् गुलि जक राहत कयाच्वन जुइ धकाः नं सहज हे अनुमान यायेफु। पर्वतय् अपहरित निम्ह मस्तय्त मालेगु ज्याय् प्रहरी व्यापक हे परिचालन जुइमाःगु दु। लिसें थज्याःगु घटनाया पृष्ठभूमिइ समाजया सुधार व शुद्धीकरण जुइमाःगु खँय् नं आः उतिकं बः बीमाःगु खनेदु ।

More Stories Like this