ख्वपया समाजसेवी बिष्णुबहादुर मानन्धर

कृष्ण प्रजापति

ख्वपय् बिष्णुबहादुर मानन्धर धायेवं समाज सेवाय् म्हमसिउपिं म्हो हे जक दइ। मुद्दा मामला मिले याना बीगु, कालबिल जुइगु विवाद मिले याना बीगु ज्याय् न्ह्याबलें सक्रियम्ह वय्कः थः अबु बिकुलाल मानन्धर थें हे त्वालय् सकस्यां यः। २००८ सालय् मां पूर्णमायाया क्वखं ख्वपया साकुलानय् बूम्ह वय्कः थः अबुया हे प्रेरणां समाजसेवाय् सक्रिय जुयादीम्ह खः। बौ बिकुलाल धार्मिक, सांस्कृतिक व समाजसेवाय् नेतृत्व हे यानाच्वंम्ह जूगुलिं वय्कःयात म्हसीकेत नं अबुया नां हे काफी जुल। थःगु परम्परागत चिकं व्यापार यायेमाःगु जुयाः एसएलसी पास जुइवं बैंकय् जागिर नयेगु अवसर नं वय्कलं त्वःतादीमाल। एसएलसी तक पास यायेत नं वय्कलं छेँ हे त्वःताः आखः ब्वनेमाःगु जुयाच्वन ।

२०१५ सालय् जूगु न्हापांगु आमनिर्वाचनय् सर्वोच्च नेता गणेशमान सिंह थःगु त्वालय् वःगु इलंनिसें हे वय्कःयाके छगू कथंया राजनीतिक चेत वःगु जुयाच्वन। गणेशमानपाखें हे वय्कलं न्हापांखुसी वामपन्थी व दक्षिणपन्थी खँग्वः न्यनादीगु खः। तर तःधिकः जुइकाः धाःसा वय्कः गणेशमानया लँय् मवँसे वामपन्थपाखे लगे जुयादिल ।

प्यदँ दुबलय् वय्कलं लामुगाःया पद्मबहादुर मानन्धरपाखें प्रारम्भिक शिक्षा कयादीगु खः। गःछेँय् च्वनाः हे बाह्रखरी पूवंकादिल। अबुलिसे अक्सर यानाः राणातय् दरवारय् नं वनेगु यानादी। राणा परिवारया संगतं यानाः अबलय् हे कोट पाइण्ट फीगु वय्कःया बानी जुल। तर दाजुपिं बुँइ वनीबलय् थः चिकं सालय् च्वने मालीगु कारणं आखः ब्वने मखनीगु जुल धकाः वय्कलं तेखाचोय् निनिथाय् च्वनाः आखः ब्वनेगु यानादीगु जुयाच्वन। नांजाःम्ह शिक्षक पशुपतिभक्त धौभारीथाय् ट्यूशन ब्वनाः वय्कलं एसएलसी सिधयेका दिल। किसानतय्सं थम्हं ज्या यानाः सयेकातःगु बाली साहुयाथाय् पू वइबलय् उमित साहुतय्सं याइगु हेला स्वये मफयाः वय्कः नं राजनीतिइ सक्रिय जुयादीगु जुयाच्वन। किसान नेता बुद्धिकुमार गोसाईंया संगतं वय्कःयात अझ सक्रिय यानादिल। अबलय् भूमिगत जीवन हनाच्वनादीम्ह नारायणमान बिजुक्छेँ रोहितयात शेल्टर बीगु ज्याय् वय्कलं म्हितादीगु भूमिका च्वछायेबहः जू। रोहितया भूमिगत जीवनया लागिं थाय् मिले यायेगु, गोप्य पौत कालबिल यायेगु ज्याय् वय्कःया भूमिका उतिकं दु ।

राजनीतिक चेतना थनेगु खःसा जन-जागरण हे यायेमाः धकाः वय्कलं विश्वनाथ बनेपालीनाप जानाः २०२९ सालय् दतात्रय प्रावि नीस्वनादिल। २०३२/३३ सालपाखे ज्याथजिथिपिनि लागिं प्रौढ कक्षा चले यासें उकी थः हे शिक्षक जुयाः जक मखु थःगु हे छेँय् कक्षा सञ्चालन यानाः तकं वय्कः सक्रिय जुयादिल। २०३२ सालय् गाउँफर्क राष्ट्रिय अभियानपाखें वडा सदस्य जुयादिल। २०३८ सालया आमचुनावय् जनताया उम्मेदवार कर्णप्रसाद ह्योजूया चुनाव प्रचारय् नं लगे जुयादिल। २०३९ सालय् वडा अध्यक्ष निर्वाचित जुयादिल। उगु इलय् वय्कलं वडाय् थुलि सक्रिय सेवा बियादिल कि २०४३ व २०४९ सालय् जूगु स्थानीय निर्वाचनय् नं वय्कः हे वडा अध्यक्ष जुयादिल।
राजनीतिक जीवन नापं वय्कः ब्यापार ब्यवसायय् नं उलि हे सक्रियम्ह जुयाः नेपाल खुद्रा ब्यापार संघ ख्वपया संस्थापक अध्यक्ष हे वय्कः जुयादिल। उगु इलय् ख्वप नगरय् जक मखु जिल्लान्यंकं हे किलों स्वीन्यातका वंगु चिनी स्वीतकां मीगु ज्या यानाः सहुलियत दरया चिनी व्यवस्था यानादीगु खः। न्हापा न्हापा ख्वपयात १० क्वीन्टल जक चिनी वइगु खःसा अबलय्निसें ४० क्वीन्टल बीगु याना हल। मानन्धर जातिया राष्ट्रिय संस्था केन्द्रीय मानन्धर संघयात ख्वपय् सक्रिय यायेगु ज्याय् नं वय्कःया तःधंगु योगदान दु ।

More Stories Like this