थनिंनिसें संसद न्ह्याइगु
एमाले-कांग्रेस सरकार दयेकेगु लँय्
राष्ट्रपति विरुद्ध छगू संकल्प प्रस्ताव तयेगु सुचं दर्ताया नापनापं एकीकृत माओवादीं थौं संसद न्ह्याके बीगु जूगु दु । माओवादीं संसद न्ह्याके बीगु जुइवं न्हूगु सरकार गठनया ज्या नं सुचारु जुइगु अनुमान याःगु दु ।
राष्ट्रपतिया विषयय् संसदय् संकल्प प्रस्ताव तये मदु धइगु खँ पिहां वयाच्वंसां माओवादीं म्हिगः अज्याःगु प्रस्ताव दर्ताया लािगं अनुमति कायेगु सुचं धाःसा दर्ता याकूगु दु । उकियात कयाः सभामुखं न्हय्न्हुया दुने लिसः बी । छुं जुयाः सभामुखया लिसः सकारात्मक जुल धाःसा संसदय् अज्याःगु प्रस्ताव दर्ता याये खनी । दर्ता धुंकाः उकिया पक्ष व विपक्षय् वहस जुइ । वयां लिपा उकी मतदान जुइ । सामान्य बहुमत वयाः प्रस्ताव पारित जुल धाःसा राष्ट्रपतियात राजीनामा बीत दवाव लाइ । तर बाध्य धाःसा जुइ मखु ।
थःपिनि संसद अवरुद्ध संकल्प प्रस्ताव व थःिपंसं बियागु राजीनामा बारे प्रधानमन्त्री प्रचण्डं थौं सदनय् संवोधन नं यानादीगु ग्वसाः दु । वय्कलं संवोधन यानादीधुंकाः माओ-वादी सभासद्तय्सं वंगु १७ न्हु न्ह्यवं निसें याना वयाच्वंगु संसद अवरुद्ध नं समाप्त जुइ ।
माओवादीं हयेत्यंगु संकल्प प्रस्तावयात सदनय् छलफल याके बीगु आश्वासन सभामुख सुभाष नेम्बाङं बियादीगु दु । तर उकी मतदान जुइबलय् व पारित हे जुइ धइगु ग्यारेन्टी धाःसा मदु । माओ-वादीं उकियात बहुमतं पारित याकेगु पूरा कुतः याइगु खँ धाःगु दु । संकल्प प्रस्ताव पारित याकेगु थौंया प्रमया संवोधन तयार यायेगु लािगं थौं सुथय् माओवादी सचिवालयया बैठक नं च्वंगु दु । लिसें थौं हे वर्तमान मन्त्रि-परिषद्या अन्तिम बैठक नं च्वनेत्यंगु दु । बैठकय् फोरम व सद्भावनाया मन्त्रीतय्त नं सःतातःगु दु ।
उखे संसद सुचारु जुइगु जुइवं सरकार गठनया ज्या न्ह्यःने यंकेगु बारे सहलह यायेत थौं नेपाली कांग्रेसया सभापति गिरिजाप्रसाद कोइराला व एमालेया प्रधानमन्त्री प्रस्तावित नेता माधव नेपाल दथुइ खँल्हाबल्हा जूगु दु ।
