स्वम्हं नेता राष्ट्रपतियाथाय्

येँ (सन्ध्या टाइम्स)/साउन २८ गतेया दुने शान्ति प्रक्रियाया ज्या ठोस रुपं मन्ह्यात धाःसा राजीनामा बीगु धकाः घोषणा यानादीम्ह प्रधानमन्त्री झलनाथ खनालं अबलय् तकया दुने शान्ति प्रक्रिया ठोस रुपं न्ह्याः मवन धाःसा शान्ति प्रक्रियाया पंगः सु खः धकाः जनतायात सार्वजनिक याना बीगु ख्याच्वः बियादीगु दु ।

थौं सुथय् राष्ट्रपति डा. रामवरण यादव समक्ष माओवादी अध्यक्ष प्रचण्ड व नेकां सभापति सुशील कोइराला समेत न्ह्यःने तयाः प्रधानमन्त्री खनालं अथे धयादीगु खः। थौं सुथय् ८ बजेनिसें साढे १ घण्टा स्वम्हं शीर्ष नेता नापं राष्ट्रपति दथुइ जूगु भेटवार्ताय् प्रम खनालं आः नं ई दनि धासें सरकारया सवालय् चक्रिय प्रणाली कथं न्ह्याः वनेफु धयादिल।उगु इलय् प्रम खनालं दलतय् दथुइ शान्ति व संविधानया निंतिं सहमति ब्वलंकेत थीथी सुझाव नं बियादीगु खः ।

वर्तमान राजनीतिक अन्यौलता ज्यंकेत राष्ट्रपतिया रोहबरय् स्वंगू दलया नेतातय् दथुइ सहमति मालेगु विषयस सहलह जूगु खँ प्रमया प्रेस सल्लाहकार सूर्य थापां कनादिल। भेटवार्ताय् नेकां सभापति कोइरालां क्वःछिनातःगु इलय् हे प्रमपाखें शान्ति प्रक्रिया व संविधान निर्माणया ज्या पूवंकेगु प्रतिबद्धता प्वंकादीगुयात लसकुस यानादीगु खः ।

वय्कलं माओवादी अध्यक्ष प्रचण्डप्रति लक्षित यासें धयादिल, 'प्रधानमन्त्रीं इलय् हे शान्ति व संविधानया ज्या पूवंकेगु गम्भीरता क्यंगु दु आः छिकपिं न्ह्याः वनादिसँ, जिम्मेवारी छिकपिनिगु हे अप्वः दु ।'

माओवादी अध्यक्ष प्रचण्डं शान्ति प्रक्रियाया सवालय् माओवादी छप्पँ छधी दु धासें शान्ति व संविधानया कार्ययोजना थःपिनि पार्टीइ पास जुइधुंकूगु अवस्थाय् शंका मयायेत इनाप यानादिल। वय्कलं लडाकुया रिग्रुपिङ, समायोजन, मापदण्ड सहितया सहमति तयार यायेफइ धकाः नं धयादिल ।

उगु भेटवार्ताय् राष्ट्रपति यादवं ईयात ध्यानय् तयाः न्ह्याः वनेत इनाप यानादिल। राष्ट्रपतिया धापू उद्घृत यासें प्रम खनालया प्रेस सल्लाहकार थापां संचारकर्मीतय्त धयादिल, 'ई तसकं म्हो जक दु, छिकपिनिगु दथुइ सहमति जुल धाःसा समस्या समाधान जुया वनी, गम्भीर जुयाः संघीय गणतन्त्रयात जोगे यायेमाः ।'

राष्ट्रपति निवासय् स्वम्ह नेतातय् दथुइ जूगु उगु भेटवार्ता प्रधानमन्त्री झलनाथ खनालया हे पहलय् जूगु खँ नं धाःगु दु। खनालं थःगु प्रतिवद्धताय् विश्वस्त जुइकेत उगु कुतः यानादीगु खः ।