चलः वनाः छखा हे छेँया स्वम्ह बेपत्ता
येँ (सन्ध्या टाइम्स)/रोल्पाया तेवाङ लागाय् थौं सुथय् चलखं ल्हानाः छगू हे परिवारया स्वम्ह मस्त सीगु दु।
चलखं ल्हानाः सीपिं तेवाङ गाविस वडा नं. १ या गजुधाकाया बलराम थापाया ११ दँ दुम्ह म्ह्याय् नरमाया थापा, ९ दँ दुम्ह मिनु थापा व ५ दँ दुम्ह काय विमल थापा क्षेत्री खः। जिल्ला प्रहरी ज्याकू रोल्पां बिउगु विवरण कथं द्यनाच्वंगु अवस्थाय् वंगु चान्हय् १ बजे छेँया च्वय्नं कुतुं वःगु चलखं ल्हानाः थ्व स्वम्ह मस्त सीगु खः। चलखं ल्हानाः बलराम व वया कला कुमरी धाःसा गम्भीर घाःपाः जूगु दु। घाःपाः जूपिं निम्हेसितं अनया प्राथमिक स्वास्थ्य केन्द्र सुलिचौरय् वासः याकाच्वंगु दु। उगु चलखं ल्हानाः बलरामया निम्ह द्वहँ नं सीगु दु ।
त्रिशुलीइ ट्रक कुतुंवनाः निम्ह तन
थौं सुथय् येँनं नारायणगढपाखे वनाच्वंगु ट्रक त्रिशुली खुसिइ कुतंुवनाः निम्ह मनू बेपत्ता जूगु दु। ना. २ ख ८७५३ नम्बरया ट्रक थौं सुथय् त्रिशुली खुसिइ कुतुंवंगु खः। चितवनया पाँच किलो धइगु लागाय् दुर्घटना जुयाः त्रिशुलीइ ट्रक कुतुंवंगु खः। उगु दुर्घटनाय् लानाः बेपत्ता जूपिं मध्ये ट्रकया चालक हाकिम मिया छम्ह नं खः। दुर्घटनाय् लानाः बेपत्ता जूम्ह मेम्हेसित धाःसा म्हसीके मफयाच्वंगु दु ।
