कांग्रेसय् हानं छगू नेवाः संगठन
येँ (सन्ध्या टाइम्स)/नेपाली कांग्रेसया नेवाः कार्यकर्तातय्सं नेवाः स्वायत्त राज्यया नितिं पार्टी दुने व पिने संघर्ष यायेत मेगु छगू न्हूगु संगठन चायेकूगु दु। 'लोकतान्त्रिक नेवाः खलः' नां तयाः छुं दिं न्ह्यः चायेकूगु उगु संगठनया नायः पदय् नेमसिंह नकःमि च्वनादीगु दु ।
झिंन्याम्ह दुजः दुगु उगु खलःया स्वम्ह न्वकुत मन्देश्वरानन्द बैद्य, अशोकमान बज्राचार्य, राजेश श्रेष्ठ, सचिवय् नविन मानन्धर, सहसचिवय् नेबिनमान श्रेष्ठ, कोषाध्यक्षय् जुद्धरत्न बज्राचार्य व दुजलय् अमृतमान बज्राचार्य, राममान सिंह, रामकृष्ण महर्जन, मानदास महर्जन, प्रशान्तमानसिंह मास्के, भाइराम खड्गी, शैलेश कर्माचार्यपिं च्वनादीगु दु ।
नेकांया नेवाःतय्गु लोकतान्त्रिक नेवाः दबू नांगु मेगु संगठन न्हापा हे दु। आः गठन जूगु खलःया नायः नेमसिंह नकःमि दबूया नं न्वकु खः। निदँ न्ह्यः गठन याःगु लोकतान्त्रिक नेवाः दबूया तःमुँज्या नं याकनं हे यायेत्यंगु दु। दबू नेवाः स्वायत्त राज्य मंकाः संघर्ष समितिइ दुथ्याःगु छगू घटक खः ।
