श्रीलंकाया हुलाकय् भारत दुने लुम्बिनी
येँ (सन्ध्या टाइम्स)/श्रीलंकां पिकाःगु छगू हुलाक टिकटय् बुद्ध जन्मभूमि लुम्बिनीयात भारत दुने लाकाः क्यनातःगु खँयात कयाः नेपाःया दि शाक्य फाउण्डेशन, नेपालं विरोध याःगु दु। फाउण्डेशनया नायः जनक 'नेवाः' शाक्यपाखें थन छगू वक्तव्य जारी यासें श्रीलंकां मई १५, २०११ स जारी याःगु ५ तका वंगु उगु हुलाक टिकटय् नेपाःया मायादेवी देगःयात भारत दुने लाकाः क्यनातःगु खः ।
फाउण्डेशनं उकियात कयाः नेपाःस्थित श्रीलंकन राजदूतावासय् नं विरोधपत्र बीत्यनागु खँ वक्तव्यय् धयातःगु दु। श्रीलंकां अज्याःगु हुलाक टिकट पिकाःगु बारे वंगु श्रावण १३ गते 'गोरखापत्र' न्हिपती छम्ह ब्वँमिं सम्पादकयात पौ च्वयाः हुलाक टिकटया फोटो नापं छापे याना हःगु खः। पत्रिकाय् पिदने धुंकाः सुनां छुं मधाःगु खँय् नं फाउण्डेशनं विरोध याःगु दु ।
