२८ गते राजीनामा बीगु प्रमया घोषणा

माओवादी मन्त्रीतय्त सपथ ग्रहण याकेवं हे प्रधानमन्त्री झलनाथ खनालं आः नं यदि शान्ति प्रक्रिया व संविधान निर्माणया ज्या न्ह्यःने मन्ह्याकल धाःसा श्रावण २८ गते राजीनामा बी धकाः सार्वजनिक रुपं हे न्ववानादीगु दु। सुं नं प्रधानमन्त्रीं थःगु राजीनामाया तिथि हे थुकथं घोषणा यानाः शासन यायेत्यंगु नं थ्व न्हापांगु हे घटना जुइफु। लिसें थःगु राजीनामाया तिथि हे घोषणा याना बिउगु कारणं सरकार दुने प्रधानमन्त्री खनाल व वय्कःयात समर्थन यानाच्वंगु माओवादीया स्वापू गुलि खराब जुइधुंकल धइगु खँ स्पष्ट जू। माओवादीया कारणं वय्कः गुलि हैरान जुइधुंकल धइगु खँ नं थुकिं सीदु ।

यदि वय्कःया घोषणाय् सत्यता दुसा वय्कलं माओवादीं सिफारिस याना हःपिं मन्त्रीतय्त सपथ ग्रहण याकादीगु नं थ्वहे सर्तय् जुइमाः। माओवादीं आः शान्ति व संविधानया ज्याखँ न्ह्यःने यंकेगु बचं बिउगु कारणं हे खनालं पार्टी दुने ल्वानाः जूसां सपथ ग्रहण याकेगु ज्या याःगु जुइमाः। यद्यपि माओवादीया मन्त्रीत हिलाबुला जुयां सम्बद्ध मन्त्रालयया ज्याय् छुं हिउपाः वइगु धाःसा खने मदु। थ्व मन्त्रालय व मन्त्रीया ज्यायात गति बीगु लागिं जूगु हिलाबुला मखु। थ्व माओवादीया आन्तरिक कचवं समाधान यायेत जक जूगु हिलाबुला खः। तर माओवादीया आन्तरिक समस्या ज्यंकेत जूगु थ्व मन्त्री हिलाबुलां प्रधानमन्त्री खनालया पार्टी एमाले दुने धाःसा तःधंगु आन्तरिक समस्या पिकया बिउगु दु। थुलि जुयाः नं यदि शान्ति प्रक्रिया न्ह्याः मवन धाःसा प्रमं राजीनामा बीगु ला द हे दु, तर वयां लिपाया समस्या धाःसा उगु राजीनामां नं समाधान याये फइ मखु, थ्व निश्चित खः ।

More Stories Like this