अमेरिकाय् कर्जाया सीमा अप्वयेकेगु प्रस्ताव पारित

अमेरिकाया सिनेटं नं कर्जाया सीमा अप्वयेकेगु प्रस्ताव पारित यायेवं अमेरिकाया राष्ट्रपित बाराक ओबामां उकि ल्हाःचिं तयादीगु दु । मंगलवाः सिनेटंय् जूगु मतदानय् प्रस्तावया पक्षय् ७४ मत व विपक्षय् २६ मत लाःगु खः । सिनेटय् मतदान जुइ न्ह्यः उगु प्रस्तावयात प्रतिनिधिसभां पारित याःगु खः ।

प्रतिनिधिसभां कर्जाया सीमा अप्वयेकेगु प्रस्तावया पक्षय् २६९ मत व विपक्षय् १६१ मत लाःगु खः । अमेरिकाय् कर्जाया सीमा अप्वयेकेगु मंगलवाः लिपांगु दिं खः ।

यदि कर्जाया सीमा अप्वयेकेगु प्रस्ताव पारित मजूसाः अमेरिकाय् तरलता अभाव जुइगु विज्ञतय्सं ख्याच्व बिया वयाच्वंगु खः । अमेरिकाया मू निगू दल डेमोक्रेटिक व रिपब्लिकन दथुइ वंगु आइतवाः लिबाक्क तिनि थुगु प्रस्तावय् सहमति जूगु खः । सहमति कथं १४.३ खर्व डलरया सीमाय् २.४ खर्ब डलर अप्वयेकूगु खः ।

More Stories Like this