दलितया धलखं थीथी नेवाः जातयात चीकेत ज्ञापनपौ

राष्ट्रिय दलित आयोग नीस्वनेत दयेकूगु विधेयकय् नेवाः समुदायया छुंछुं जातयात नं दलितया धलखय् दुथ्याकातःगु विषयलय् नेवाः दये दबूया ध्यानाकर्षण जूगु धासें स्थानीय विकास मन्त्री उर्मिला अर्यालया ज्ञापनपौ लःल्हाःगु दु ।

नेवाः देय् दबूया नायः नरेश ताम्राकारया नेतृत्वय् थीथी जातिय खलः पुचःतय् प्रतिनिधित सहित वंगु छगू पुचलं मंगलवाः स्थानीय विकास मन्त्री अर्यालयात ज्ञापनपौ लःल्हाःगु खः । नेवाः समुदाय दुने छुत अछुतया भेदभाव यायेगु व धार्मिक स्थलय् वनेत पनेगु परम्परा मदुगु धासें सम्बन्धीत विधेयकं नेवाः समुदाय दुने लाःपिं जातितय्त चीकेत उगु पुचलं माग याःगु खः ।

ज्ञापनपौ लःल्हाना कयादिसें मन्त्री अर्यालं द्योला व खड्गीतय् सम्बन्धीत संस्थां थ्वस्वयां न्ह्यः हे लिखित रुपं थःपिं दलित मखु धकाः निवेदन तयेधुंकूगुलिं उगु निगू जातियात दलितया धलखं चीकेगु प्रक्रिया सुरु जुइधुंकूगु धयादिल । नापं वय्कलं आः ल्यँ दुगु मेमेगु जातियात नं याकनं हे चीकेगु प्रतिबद्धता प्वंकादिल ।

ज्ञापनपौ लःल्हायेत देय् दबूया नायः ताम्राकार नापं देय् दबूया छ्याञ्जे माइलाबाबु द्योला, नेवाः स्वायत्त राज्य मंकाः संघर्ष समितिपाखें सानुराजा शाक्य, नेवाः लोकतान्त्रिक संघपाखें केबी घःजु, आदिवासी जनजाति महासंघ यल जिल्लापाखें न्हुच्छेलाल महर्जन नापं द्योला समाज, खड्गी, कपाली लगायत थीथी संस्थाया प्रतिनिधितय् ब्वति दुगु खः ।

लुम्केबहजु, स्थानीय विकास मन्त्री अर्यालं राष्ट्रिय दलित आयोग नीस्वनेत दयेकूगु विधेयकय् नेवाः समुदाय दुनेया द्योला, पोडे, खड्गी, कसाई, कपाली, कुस्ले व च्यामे आदि जातयात दलितया धलखय् दुथ्याकातःगु खः ।

More Stories Like this