प्रमयात कारवाहीया ख्याच्वः

विद्या भण्डारी भारतंनिसें बैठकय् ब्वति काः वल

येँ (सन्ध्या टाइम्स)/प्रधानमन्त्री झलनाथ खनालं माओवादी मन्त्रीतय्त सपथ ग्रहण याकूगु कारणं एमाले दुने कचवं पिहां वःगु दु। प्रम खनालं पार्टीया विरोध दयेक दयेकं नं माओवादी मन्त्रीतय्त सपथ ग्रहण याकूगुलिं वय्कःयात कारवाही यायेगु धकाः तक आः पार्टी दुने तयारी सुरु जूगु खँ एमाले सूत्रं धाःगु दु। विज्ञ सूत्रं बिउगु जानकारी कथं प्रम खनालं सपथ ग्रहण याकेगु जुल धकाः सार्वजनिक अभिव्यक्ति बिउगुलिं वय्कःयात म्हिगः च्वंगु स्थायी समितिया बैठकं हे कारवाहीया निर्णय यायेगु तयारी जूगु खः। वहे तयारी कथं भारतया न्हूदिल्लीइ वासः याकः वनाच्वंम्ह उपाध्यक्ष विद्या भण्डारीयात म्हिगः हे नेपाः थ्यंकः वा धकाः सःता छ्वःगु खः। भण्डारी थःत फोन याना हःगुयां निघौ दुने हे टिकट मिले यानाः नेपाः लिहां झाःगु खः ।

स्थायी समितिया बैठकय् नं प्रम खनाल बैठक च्वँच्वं हे दथुइ सपथ ग्रहण याकः वनेत्यल धकाः दना वंगु खःसा उपाध्यक्ष वामदेव गौतम नं 'अध्यक्ष हे वनेधुंकल, आः जि नं वने' धकाः बैठक त्वःताः दना वंगु खः ।

'प्रम माओवादीया लिउलिउ वन'
एमाले नेता केपी ओलीं प्रधानमन्त्री झलनाथ खनाल पार्टीया नीति व निर्णयया अःखः माओवादीं धाः थे ज्या यानाच्वंगु द्वपं बियादीगु दु। प्रेस चौतारीं थौं ओलीया छेँय् हे याःगु अन्तर्क्रियाय् न्ववासें वय्कलं माओवादी मन्त्रीतय्त सपथ ग्रहण याकेगु एमालेया निर्णय मखु, थ्व माओवादीया निर्देशन कथं याःगु ज्या खः धयादिल। प्रम खनालं २८ गते राजीनामा बी धाःगु प्रधानमन्त्रीया शब्दजाल जक खः धकाः नं द्वपं बियादिल। एमाले उपाध्यक्ष बामदेव गौतमं म्हिगः स्थायी समितिया बैठकय् पार्टी तछ्यायेगु ख्याच्वः बियादीगु खुलासा नं ओलीं यानादिल ।