प्रतापपुरया ठेकेदार बिसिउँ वन
शीला साय्मिपाखें
येँ/मलखं कयाः क्षतिग्रस्त जूगु स्वयम्भुया प्रतापपुर देगः जीर्णोद्धारया जिम्मा काःम्ह ठेकेदार ज्या दथुइ हे त्वःताः बेपत्ता जूगु दु। आः प्रतापपुर जीर्णोद्धार यायेगु खःसा क्वथ्यंक हे पीमाः धाःगुलिं थौंकन्हय् देगः पीगु ज्या जुयाच्वंगु खः। तर छतँ ति देगः पी ल्यं दनिबलय् ठेकेदार बेपत्ता जूगुलिं ज्या दथुइ हे थानाच्वंगु दु ।
देगःया दुने अझ नं द्यः दनिगु तर देगः धाःसा च्वय् ह्वांक चाःगुलिं द्यः समेत असुरक्षित जुयाच्वंगु खँ स्वयम्भु महाचैत्य व्यवस्थापन महासमितिया महासचिव महेन्द्ररत्न बुद्धाचार्यं कनादिल । थौंकन्हय् पितिपिति वा वयाच्वंगु व गुंला नं सुरु जुइधुंकूगु इलय् देगः पियाः दथुइ हे त्वःता तःगुलिं अन गुंलां स्वयम्भु चाःहिउ वइपिं मनूतय्त नं समस्या जुयाच्वंगु दु ।
भाजु बुद्धाचार्यं कनादी कथं ठेकेदार मवःगु बारे महासमितिपाखें पुरातत्व विभागया अधिकृत दामोदर गौतमयात स्वापू तयाः न्यंबलय् बजेट मगाःगुलिं मवःगु धकाः जानकारी बियाहःगु खः। देगः पीगु लागिं ठेकेदारं न्हय्न्हु ति जक ज्या यानाः बेपत्ता जूगु खः ।
