मतयाः जात्रायात माःगु बाजं स्यनेज्या क्वचाल

यल (सन्ध्या टाइम्स)/थुगुसी मतयाः न्यकू जात्रा पाःलाः क्षेत्र नं ८ इखालखु जोम्बहाः त्वालय् परम्परांनिसें न्ह्यानाच्वंगु संस्कृति व शास्त्रीय बाद्यवादनय् आधारित धाः बाजा, नौ बाजा व दमोखिं थायेगु तालिम क्वचाल। ज्याझ्वलय् मूलगुरु समाजसेवी मोतिलाल शिल्पकारं तालिमय् ब्वति काःपिंत बाजं लःल्हानाः पिथनेगु ज्या जूगु खः। संस्कृतिविद सत्यमोहन जोशी, त्वाःया बाद्यवादन ज्ञातापिनि उपस्थितिइ जूगु उगु ज्याझ्वलय् न्हूपिं झिम्ह मिसापिं व नीम्ह मिजंपिं प्रशिक्षार्थीतय्सं ब्वति काःगु खः। उगु बाजं स्यनेगु ज्याझ्वलय् पुधाः, धाः, भुस्याः, न्यकू, हुहुचा, नौ बाजंत खन्जनी बाजं, मगःखिंचा बाजं, मृदंग बाजं, धोलक बाजं, दर्मा बाजं, धोधोचा बाजं, कजो नगरा बाजं, दह बाजं, दमोखिं बाजं, कान्तां डब डब बाजंत स्यनेगु ज्या जूगु खः। थुकिया लिसें नासःद्यः पुजा यानाः द्यःया न्ह्यःने बाजं थानाः क्यनेगु ज्या नं जूगु खः। मंगःया ऐतिहासिक लाय्कू न्ह्यःने काति दबुली भाद्र कृष्णपक्ष दुतिया कुन्हु थुगु बाजंया मू जात्रा न्ह्याइ ।