हाइकु न्यने-हाइकु ब्वने
कुपण्डोलया सातोआकि भवनय् थुगुसी छगू न्ह्यइपुगु ज्याझ्वः जुल - हाइकु न्यने व हाइकु ब्वने। प्रतिभा समाजया साधारणसभा, प्रतिभा बुक बैंकया दँमुँज्या अले सातोआकि इतो स्मृति दिवस स्वता ज्याझ्वःया लसताय् नःलि नेपालभाषा साहित्यिक पत्रिकाया ग्वाहालिइ उगु हाइकु ज्याझ्वः जूगु खः ।
स्वयम् हे साहित्यकार लिसें प्रतिभा समाजया नं नायः पद्मरत्न तुलाधरया सभापतित्वय् जूगु उगु ज्याझ्वलय् जनकवि दुर्गालाल श्रेष्ठं निसें कयाः नकतिनि हाइकु च्वयेगु सुरु यानादीपिं हाइजिनपिंसं तकं हाइकु पाठ यानादीगु खः। मदुम्ह सातोआकिया अबु भाजु मासानोबु इतों थ्वहे लसताय् लाकाः जापानं छ्वया हयादीगु हाइकु नं समाजया मूछ्यांज्ये किरण नर्सिंहं शाक्यं नेवाः भासं उल्था यानाः ब्वनादीगु खः ।
ज्याझ्वलय् प्रा. नर्मदेश्वर प्रधानं जापानी हाइकु लिसें विम्बवादया विषयय् कनादिलसा हाइजिन भूषणप्रसाद श्रेष्ठं हाइकु व सेनेरियोया बारे ध्वाथुइकादिल। समाजया न्वकु प्रा.डा. वजाचार्यं लसकुस यासें न्ह्याकूगु उगु ज्याझ्वलय् हाइजिनपिं ईश्वरी मैंया श्रेष्ठ, तुयू पुं, बुद्ध नेवाः, मोक्ष बहादुर अमात्य, रासा, डा. वज्राराज शाक्य, विजयरत्न असंबरे, बद्री बेदना, शाक्य सुरेन, महेशमान लँजुवाः, सौरभ शाक्य व विमल ताम्राकारं थःपिनि हाइकु पाठ यानादीगु खः ।
थनिं १९ दँ न्ह्यः मात्र झिंखुदँया बैंशय् नेपाः वःम्ह जापानी मचा भाजु सातोआकि इतो नेपाःया घोप्टेभिरय् जूगु थाई विमान दुर्घटनाय् मदुगु खःसा वय्कःया हे लुमंतिइ वय्कःया थःथितिपिंसं दँय्दसं थुकथंया ज्याझ्वः याना वयाच्वंगु दु। नःलि साहित्यिक पौया सम्पादक नरेशवीर शाक्यं ज्याझ्वलय् ब्वंगु हाइकु थःगु पत्रिकाय् पिकायेगु बचं बियादिल ।
