अंश मुद्दाय् किजाया परिवारयात हे स्याना बिल
येँ (सन्ध्या टाइम्स)/अंश विवादय् छम्ह दाजुं थः किजाया पुरा सन्तानयात हे स्याना बिउगु दु ।
सर्लाही जिल्लाया पडरिया गाविस वडा नं. ९ य् च्वंम्ह राजेन्द्र साहं अंशया खँय् ल्वापु जुयाः ४० दँ दुम्ह थः किजा रामेश्वर साह, वया प्वाथय् दुम्ह कलाः सुरखिदेवी साह व काय्चा खुश्रु साहयात स्याना बिउगु खः। किजाया परिवारयात स्याये धुंकाः दाजुम्ह राजेन्द्रया परिवारया १२ म्हं दुजःत बिसिउँ वंगु दु ।
प्रहरी उपरीक्षक मोहनराज जोशीं अंश विवादया कारणं दाजुया परिवारं किजाया पुरा परिवारयात हे स्याना बिउगु खँ धाःगु दु। दाजु व किजाया दथुइ अदालतय् अंश सम्बन्धी मुद्दा नं लानाच्वंगु दु। दाजु किजाया निगू हे परिवार छखा हे छेँय् च्वना वयाच्वंगु खः ।
वंगु चान्हय् १२ बजे किजाया पुरा परिवारयात हे स्यानाः दाजुया परिवार बिसिउँ वंगु खँ स्थानीय प्राणचन्द्र रायं धाःगु दु। किजाया भ्वछिसितं स्याये धुंकाः उमिगु लाशयात बोराय् प्वःचिनाः अनया लखनदेही खुसिइ वांछ्वया बिउगु खः ।
खुसिइ वांछ्वःगु लाश मध्ये भौम्ह सुरखिदेवी साहया सीम्ह थौ सुथय् लुइकूगु दु। वयागु सीम्ह सतकं बाघौ ति न्यासि वनाः थ्यनीगु थासय् लूगु खः। मेपिं निम्हेसिया सीम्ह धाःसा अझ नं मालेगु ज्या जुयाच्वंगु दनि ।
