अन्ततः कांग्रेस नं माओवादीया हे लँय्

नेपाली कांग्रेसं प्रधानमन्त्री झलनाथ खनालया राजीनामा माग यासें सदन अवरुद्ध यानाच्वंगु दु। यदि माओवादीं सिफारिस याःपिं मन्त्रीतय्त सपथ ग्रहण याकल धाःसा झन् हे विरोध यायेगु जुइ धकाः ख्याच्वः बियाच्वंगु कारणं आः कांग्रेस अझ उग्र जुइगु निश्चित दु ।

तर कांग्रेसं प्रधानमन्त्रीया राजीनामा माग यानाः संसद अवरुद्ध याना जुइगु गुलि पाय्छि धइगु न्ह्यसः धाःसा आः वयाः पिहां वःगु दु। प्रधानमन्त्रीं राजीनामा बीमाः धकाः समग्र संसद हे अवरुद्ध याना जुइगु कांग्रेसया थ्व ज्या माओवादीया उग्रवादी ज्या स्वयां छु फरक जुल? न्हापा माओवादीं थज्याःगु ज्या याइबलय् नेपाली कांग्रेसं हे लोकतन्त्रया खँ न्ह्यःने तयाः उकिया आलोचना याइगु खः। तर थौं थः प्रतिपक्षीइ लाःबलय् वहे ज्या थःपिंसं तुं यानाः लोकतन्त्रया अपमान यानाच्वंगु दु। माओवादीयात रुपान्तरण यानाः उग्रतां लोकतान्त्रिक लँपुइ हयेमाःपिं कांग्रेस थः हे थौं लोकतान्त्रिक लँपु त्वःताः उग्रतापाखे दुहां वनेगु कांग्रेसया थ्व पहः कन्हय् वनाः वयात हे प्रतित्युत्पादक जुइगु खनेदु। कांग्रेसया थज्याःगु ज्यां यानाः कन्हय् माओवादीयात अझ उग्र जुइत तिबः बीगु खँय् शंका मदु। कन्हय् माओवादीं अज्याःगु ज्या याइगु इलय् न्ववायेगु थाय् कांग्रेसयात मदयेका बी।
लिसें कांग्रेसं थौंकन्हय् यानाच्वंगु संसद अवरुद्धपाखें थ्व पार्टी नं वास्तवय् धाथें हे लोकतन्त्र व संसदयात विश्वास याइगु पार्टी मखु खनिं धइगु सन्देश जनताय् बिउगु दु। थौंकन्हय् देय्या गुलिखे थासय् कांग्रेसया भ्रातृ संगठनतय्सं यानाच्वंगु बन्द ज्याझ्वःतय्सं नं थुकियात पुष्टि याइ। कांग्रेसं थःगु लोकतान्त्रिक छबी बचे यायेमाःगु दु ।

More Stories Like this