छाय् थें ......?

नर्मदेश्वर प्रधान

खँयाखँय्
क्रान्ति। खँग्वः न्यने। नुगलय् थी। नुगलय् दी। क्रान्ति खँग्वः। खनी। काये। उखेथुखे पुइके। रसदार। ह्याउँसे। रंगीन खनी। आकर्षक। नुगः चकनी। क्रान्ति। गबलय् थ्व खँग्वः थ्वइ। जिं ताइ। जिगु न्हाय्पं साली। जिं न्हाय्पं बी। जितः न्ह्यइपुइ। क्रान्तिया म्येँत। न्यने। आनन्द अनुभूति जुइ। हि क्वाना वइ। दासि वइ। नुगलय् उर्जा तरंगित जुइ। म्वायेत तागत लुइ। क्रान्तिया सफूत ब्वने। तःधंगु उत्प्रेरणा जुइ। साहस लुइ। मनू शिथिल जुइ मजिउ। मनय् ग्लानी ब्वलंके मजिउ। निराशा। पराजयाया चिं खः। थुकिं शत्रु लय्ताइ। शत्रुया विजय जुइ। साहस माः। समाज विरोधी शोषकतय्त बुके फइ। निर्मुल याये फइ। आस्था दयेमाः। आशावादी जुइमाः। विजय शोषित वर्गया पक्षय् जुइ। थ्व निर्विवाद। निश्चित। क्रान्तिया कविता ब्वने। गुगुं त्वःफिके मखु। लूगु फुक्क ब्वने। मालाः मालाः ब्वने। क्रान्तिया कविता। जितः यः। न्ह्याक्व ब्वने। अघे मजू। अमल थें। त्वःते मफु। क्रान्ति कवितां जितः साहस बी। जि सङ्घर्षशील जुइमाः। हःपाः बी। मन क्वतुंके मजिउ। बलाक्केमाः। ग्वाकी। क्रान्ति कवितात ब्वने। सवाः काये। माक्कुसे च्वनी। चाक्कुसे च्वनी। क्रान्तिकारी कवित श्रद्धापात्र जुइ। इमिगु क्रान्ति चेतना। स्तुत्य तायेके। कवित चेतनाया बाहक खः। इमिगु प्रेरणां मनूत संघर्षशील जुइ। यथास्थितिं चिलेमाः। ज्ञां काइ। तत्पर जुइ। न्हूगु युग हइ। क्रियाशील जुइ। क्रान्तिकारी कविता। थ्वं नुगः न्वयेकी। क्वाकी। ग्वाकी। नुगः ख्वाउँकी मखु। म्वानाच्वनागु जीवन्तताया अनुभूति बी ।

सफू पसलय् वने। क्रान्ति विषयया सफूत माले। खनी। न्याये। छेँय् हये। क्रान्तिकारी समिक्षकतय् सफूत संकलन याये। मुंके। जीवन, समाज। क्रान्तिकारी मिखां थुमित गय् स्वयेगु ! गय् लनेगु ! गय् विश्लेषण यायेगु ! सयेके। सीके। समाजया स्वरुप छु खः? शोषणया कारण छु खः? पहिचान गय् यायेगु? सामाजिक विश्लेषणया आधार छु छु खः? गय् सीकेगु? क्रान्तिकारी समिक्षकतय् सफू ब्वने। थुपिं न्ह्यसःतय् लिसः माले। लिसः लुइके। सत्य, असत्य छु खः? थुइके। समाजया पीडा। गुकथं चीके फइ? उपाय छु ? साहित्यया सामाजिक जनदायित्व छु? छु जुइमाः? क्रान्तिकारी समिक्षकतय् धापू ब्वने। साहित्य मनोरञ्जनया लागिं जुइ मजिउ। विलासीताया लागिं साहित्य च्वये मजिउ। समाज, जनताप्रतिया दायित्व। साहित्यं वाःचायेकेमाः। साहित्य हिउपाःया पक्षधर जुइमाः। जनताया पक्षय् विजय निश्चित। साहित्य्र जनतायात आश्वस्त यायेमाः। आशावादी सन्देश बीमाः। जनताया मनोबल थकायेमाः। क्रान्तिकारी जनताया चेतना थनेगु। पीडित जनता, शोषित वर्ग थुमिगु हितया पक्षधर। गुगुं नं साहित्य रचना। जित यः। प्रियः जुइ। जिं स्वये। ब्वने। थुइके। जिं त्वःमफिका ।

इतिहास ब्वने। इतिहास दुने क्रान्तिकारी घटना दइ। जन-आन्दोलनया खँत वइ। ल्ययाः ल्ययाः ब्वने। जनताया लागिं जीवनदान बिउपिं महान् योद्धातय् खँ वइ। सभक्ति ब्वने। उत्पीडित जनताया हकहितया लागिं इमिसं बिउगु योगदान लुमंके। मती वइ। इपिं मसीनि। इमि संर्घष जारी तिनि। गन तक विश्वय् शोषण, अन्याय, अत्याचार दइ इपिं प्रेरणाया स्रोत जुइ। जुया हे च्वनी। इमिगु महान क्रान्तिकारी सन्देश। थ्वया हे च्वनी। जनतायात इमिसं हःपाः बिया हे च्वनी। क्रान्ति माः। तर क्रान्ति थः हे वइ मखु। क्रान्ति ला यायेमाः। क्रान्तियात हयेमाः। योद्धातसें क्रान्तियात हइ। क्रान्तिया म्हगस। क्रान्तिया नेता। योद्धातय्सं ग्वइ। जनतयात गुकथं मुक्ति बीगु। हिसाब याइ। थःगु म्हगस पूवंकेत अग्रसर जुइ। न्ह्याइ। जनतायात थनी। एकत्रित याइ। नेतृत्व बी। म्हगस पूवंकी। जनताया निम्तिं बलिदान बी। थःगु ऐशआराम, स्वार्थयात त्वःती। पारिवारिक संकिर्णतां पिहां वइ। देश, जनताप्रति समर्पित जुइ। देश, मानवमात्रया मुक्तिया लागिं इपिं प्रेरणाया स्रोत जुइ। इपिं चिर-स्मरणीय जुइ। क्रान्ति पुरुषतय् इतिहास। लिसा लिसा कयाः ब्वने। न्ह्याक्व ब्वंसां न्हूगु सवाः वइ। द्वालुइ मखु ।

क्रान्ति। थ्वलिसे जिगु आर्कषण दइ। क्रान्ति खनी। छ्यं ल्ह्वने। जिगु छाति चकनी। क्रान्तिया आदर्श जित यः। प्राण तुल्य। क्रान्तिया ह्यमि जि। तर जि योद्धा मखु। क्रान्तिकारी नेता मखु। क्रान्तिप्रति जिगु आस्था। मायामोह दु। थःगु थासय् च्वने। क्रान्तिया आदर्श पालन याये। क्रान्तिया अःखः वने मजिउ। थुइके। बिचाः याये। कुतः याये। क्रान्तिया निंतिं आन्दोलन जुइमाः। संघर्ष न्ह्यायेमाः। जनता जुरुजारुं दना वयेमाः। अझ मूलभुत खँ लुमंके। विश्वास जुइ। प्रत्येक मनू। थःगु व्यक्तिगत स्तरं क्रान्तिप्रति इमान्दार जुइमाः। सही क्रान्ति व्यवहारिकताय् दइ। प्रतिवद्धता दयेमाः। व्यक्तिगत व्यवहारिकता, क्रान्तिप्रतिया प्रतिवद्धता। समष्टिगत क्रान्तिया आधारशीला जुइ। क्रान्ति समष्टिगत आन्दोलन खः। थ्वया सुरुवात व्यक्तिगत व्यवहारिक स्तरं न्ह्याइ। व्यक्तिगत, व्यवहारिकय् कमजोर क्रान्तिकारी नेतृत्व समष्टिगत आन्दोलनय् न्ह्यःने लायेफु। तर थुज्वःगु नेतृत्व पाखण्डी जुइ। जग मदुगु छेँ जुइ। सही क्रान्तिया निंतिं अन्ततः आत्मघाती जुइ ।

करोडौं वंगु गाडी। झकीझकाउ जीवनशैली। आकर्षक भेषभूषा। रजतपतया नायकतय् अनुकरण। तामझाम। क्रान्तिया नेतात फँसे जुइ। न्वचुइ चप्पलवालातय् खँ ल्हाइ। सुकम्वासीतय् वकालत याइ। दुःखी, पीडित जनताया खँ ल्ह्वनी। सः थ्वयेकी। तर आश्चर्य ! नेतातय् क्रान्तिकारी खँ इन्जेक्सन बियाः पाके यानातःगु अं थें च्वनी। रङ्ग इलाः नुगः सालीगु स्याउ थें ताइ। पिने बांलाइ। तर अखाद्य। विषाक्त। जितः क्रान्ति यः। तर छाय् थें ! थौंकन्हय् नेतात मयः ।

छगू न्हयसलं जिगु न्ह्यपु चाःहिली। नेतात मयः। मयया बी। नेतात मययेवं जि क्रान्ति विरोधी जुइ ला?

More Stories Like this