सपथ याकल धाःसा सहमति त्वाःदली: कोइराला

येँ (सन्ध्या टाइम्स)/नेपाली कांग्रेसया सभापति सुशील कोइरालां प्रधानमन्त्री झलनाथ खनालं यदि माओवादीं सिफारिस याना हःपिं मन्त्रीतय्त सपथ ग्रहण याकल धाःसा सहमतिया आधार त्वाःदली धकाः ख्याच्वः बियादीगु दु। थौं सुथय् न्यागू बुँदे सहमति पत्रकार सरोकार समितिं कांग्रेस सभापति कोइरालायात नापलानाः ज्ञापन पौ लःल्हाःगु इलय् वय्कलं अथे धयादीगु खः। नेता कोइरालां माओवादीया न्हूपिं मन्त्रीतय्त सपथ ग्रहणया सवालय् सशक्त कथं विरोध यायेगु जुइ धयादिल। वय्कलं धयादिल 'प्रधानमन्त्रीं न्यागू बुँदाया सहमति कार्यान्वयनया थासय् सहमतिया आधार त्वाःथलेगु कथं सपथ ग्रहण याकेत्यंगु दु। आः सपथ ग्रहण याकेगु ई मखु। थुकिं यानाः सहमतिया आधारयात त्वाःथलेत्यंगु दु ।'

नेता कोइरालां न्यागू बुँदाया सहमति कथं प्रधानमन्त्रीया राजीनामाया नितिं माओवादी मन्त्रीतय्त सपथ ग्रहण याकीगुयात सशक्त कथं विरोध यायेगु जुइ धकाः ख्याच्वः बियादीगु दु। वय्कलं आः व्यवस्थापिका संसदयात नं अबरुद्ध यानां तुं च्वनेगु जुइ धकाः नं न्ह्यथनादिल। सहमति यायेगु तर कार्यान्वयन मयायेगु माओवादीया प्रबृत्तिं यानाः हे शान्ति व संविधान ज्यामछिंगु अवस्थाय् थ्यंगु खँ नं कोइरालां धयादिल। माओवादी शान्ति व संविधानप्रति जिम्मेवार मजू धासें वय्कलं धयादिल 'माधव नेपालं राजीनामा बीवं प्यन्हुया दुने समस्या समाधा जुइ धाःम्ह माओवादी आः गन वनाच्वना?'

ई म्हो जक दुसां माओवादी जिम्मेवार जुल धाःसा शान्ति वइगु दावी नं वय्कलं यानादिल ।