विवादित विषय याकनं ज्यंकेत निर्देशन

येँ (सन्ध्या टाइम्स)/न्हूगु संविधानया न्हापांगु मस्यौदा तयार यायेगु भाला कयातःगु संविधानसभाया संवैधानिक समितिं थःपिनि अन्तर्गतया उपसमितियात याकनं विवाद ज्यंकेत निर्देशन बिउगु दु ।

ताः ई लिपा थःगु हे ज्याकू सिंहदरवारय् थौं सुथय् च्वंगु संवैधानिक समितिया बैठकय् भदौ १४ गते वयेत्यंगु जुयाः उपसमितियात याकनं विवाद ज्यंकेत निर्देशन बिउगु खः। बैठकय् लिपांगुखुसी सविधानसभाया म्याद थप याःगु लच्छि जक ल्यं दनिगु अवस्थाय् याकनं ज्या यायेमाल धकाः उपसमितिया दुजःतय्त निर्देशन बिउगु खः। अथे हे शान्ति प्रक्रिया व संविधान निर्माणया ज्या न्ह्याः मवनाच्वंगुलिं संवैधानिक समितिया दुजःतय्सं चिन्ता नं प्वंकूगु खः। थौंया बैठकय् न्ववाःपिं झिम्ह सांसद्तय्सं मूल रुपं स्वंगू दल दथुइ सहमति जुइ मफयाः हे समस्या जुयाच्वंगु बिचाः प्वंकूगु खः। सविधानसभाया म्याद थप याये न्ह्यः स्वंगू दलया दथुइ भाद्र १४ गतेया दुने संविधानया एकीकृत मस्यौदा तयार यायेगु धकाः न्यागू बुँदाया सहमति जूगु खः। उगु बैठकय् उपसमितिया संयोजक माओवादी अध्यक्ष प्रचण्डं आः तकया दुने थःपिंसं सहमति ब्वलंकागु विषययात कयाः प्रगति विवरण न्ह्यब्वयादीगु खः। असार ३० लिपा थौंतिनि उपसमितिया संयोजक प्रचण्डं उकथंया प्रगति विवरण न्ह्यब्वयादीगु खः। न्हूगु संविधानया निंतिं आः राज्य पुनर्संरचना, शासकीय स्वरुप व निर्वाचन प्रणाली यानाः २७ गू विषयय् दलतय् दथुइ विवाद जुयाच्वंगु दनि ।

संविधानसभा संवैधानिक समितिया मेगु बैठक बुधवाः च्वनीगु जूगु दु। अथे हे विवादित विषय ज्यंकेगु नितिं उपसमितिया बैठक धाःसा कन्हय् हे च्वनीगु जूगु दु ।