सुखी होतु नेपालया झिंछक्वःगु दँमुँज्या

येँ (सन्ध्या टाइम्स)/भिक्षु धर्मगुप्त महास्थविरया विशेष आतिथ्य व सुखी होतु नेपालया अध्यक्ष भिक्षु निग्रोधया सभापतित्वय् नेपाःया बौद्ध ल्याय्म्हतय्गु संगठन सुखी होतु नेपालया झिंछक्वःगु वार्षिक सभा जुल ।

भिक्षु धर्मगुप्त महास्थविरं पञ्चशील प्रार्थना यानाः न्ह्याकाबिज्याःगु उगु ज्याझ्वलय् बुद्ध पूजा नं याःगु खः। ज्याझ्वलय् सुखी होतु नेपालया दुजः संघरत्न डंगोलं लसकुस यासें वंगु इलय् सुखी होतु नेपालं याःगु उपलब्धि, कुतःया बारे कनादिसें बःचाकःगु इलय् हे नेपाली बौद्ध समुदायय् थःगु म्हसीका बीत ताःलाःगु खँ कनादीगु खः।
ज्याझ्वःया निगूगु सत्रय् सुखी होतु नेपालया सह-कोषाध्यक्ष जोतिक नापितं सुखी होतुया उपलब्धिया स्लाइड ब्वज्या यानादीगु खः। बौद्ध ल्याय्म्हतय्गु आवश्यकता बारे सुखी होतु नेपालया सहसचिव भिक्षु जनकं ज्यापौ न्ह्यब्वयाबिज्यात। वसपोलं थौंया २१ औं शताब्दी ल्यायम्हतय्के आध्यात्मिक चेतना थनाः समाजसेवाय् न्ह्यज्याये माःगु तसकं हे चुनौतिपूर्ण ज्या जूगु खँ न्ह्यथनाबिज्यात। आध्यात्मिक शिक्षा मदयेक छुं नं ज्या यायेगु सम्भव जुइ मखु धासें सुखी होतु नेपालं आः थःगु लागायात बुलुहुँ समाजसेवाय् यंकेगु खँ नं वसपोलं कनाबिज्यात। सहलहय् वःगु खँयात याकनं हे लागू यानाः न्ह्याः वनेगु धासें सुखी होतु नेपालया अध्यक्ष भिक्षु निग्रोधं थुकिया निंतिं ल्याय्म्ह जनशक्तिया आवश्यकता जूगु खँय् बः बियाबिज्यात ।

ज्याझ्वःया लिपांगु ब्वय् भिक्षु धर्मगुप्त महास्थवीरं सुखी होतु धइगु हे थःगु नं सुखी जुइगु व मेपिंत नं सुखी यायेगु खः धासें कन्हय्या दिनय् अझ उन्नति व प्रगति याये फयेमा धकाः सुवाः बियाबिज्यात।