परियत्ति वक्तृत्व धेंधेंबल्लाः
येँ (सन्ध्या टाइम्स)/जगतसुन्दर ब्वनेकुथिया ग्वसालय् परियत्ति शिक्षा कयाच्वंपिं ब्वँमिपिनि दथुइ वक्तृत्वकला धेंधेंबल्लाः जुल। थुगुसी जगतसुन्दर ब्वनेकुथिपाखें थुगु कासाया ग्वसाः ग्वःगु खः। उगु १९ क्वःगु वक्तृत्व कलाय् १५ म्ह ब्वँमितय्सं ब्वति काःगु खः ।
उगु कासाय् मय्जु नेहा शाक्य (श्री शाक्यसिंह परियत्ति, थैना) व मय्जु एन्जीना शाक्य (युवा पुस्तकालय्, हःखा) उत्कृष्ट जूगु खः। अथे मय्जु नेहा शाक्यया "कामेशुमि च्छाचारा समस्या व बुद्ध शिक्षा'' यात अडियन्सपाखें उत्कृष्ट ल्यःगु ख: ।
शील प्रार्थना यासें जगतसुन्दर ब्वनेकुथि परियत्ति केन्द्रया सञ्चालक कमिटीया अध्यक्ष राजभाइ जकःमिया सभापतित्वय् जूगु खः। ज्याझ्वलय् मूपाहां लोटस रिसर्च सेन्टरया नायः डा. भद्ररत्न बज्राचार्य, समिक्षक कथं भिक्षु संघरक्षित व गौतमवीर वज्राचार्य, मू गुथिया नायः देवन्द्र वज्राचार्यपिनि उपस्थिति दुगु खः ।
ज्याझ्वलय् जगतसुन्दर ब्वनेकुथिया प्रिन्सिपल माया मानन्धरं लसकुस यानादीगु खःसा मय्जु सुनिता मानन्धर ज्याझ्वःया प्रतिवेदन न्ह्यब्वयादीगु खः। कमिटीया दुजः त्रिरत्न मानन्धरं सुभाय् देछानादीगु खः। ज्याझ्वःया दथुदथुइ मचा हुला प्याखं, सितार वादन व मय्जु रीता महर्जनपाखें म्येँ हालाः न्यंकादीगु खः। आकिवंया पाःब्व सुवर्ण छत्रपुर विहारया सुवर्ण बौद्ध युवा कमिटीया पूर्णमान महर्जनयात लःल्हाःगु खः ।
