श्री नाट्यश्वर गुथिया बाजं शिष्यपिं पिहां वल
श्री नाट्यश्वर गुथि त्यःर त्वाःया ग्वसालय् दछि न्ह्यवं निसें न्ह्याका वयाच्वंगु बाँसुरी व पछिमा स्यनेज्या क्वचाल। वंगु शनिवाः छगू ज्याझ्वःया दथुइ बाजं स्यनाकाःपिं शिष्यपिनि बाजं पिथनेगु ज्या जुल ।
मंगल धुनं सुरु जूगु उगु ज्याझ्वः मू पाहां बाजं गुरु नाती महर्जनं त्वाःदेवा च्याकाः उलेज्या यानादीगु खः।प्रशिक्षार्थीपिं सकसितं दसिपौ नं वय्कलं हे लःल्हानादिल। प्रशिक्षणय् मुक्कं स्वीन्ह्य्म्हेसिनं ब्वति काःगु खःसा उकी मध्ये नीन्याम्ह मिसापिं खः। प्रशिक्षार्थीपिं झिदँनिसें स्वीदँ तकयापिं दुगु खँ ग्वसाः खलकं धाःगु दु। थःपिंसं स्यनागु बाजं व बाँसुरीया थीथी बोल, ग्वारा, प्रताल, जती, च्वः, चाली लगायत नासःद्यःया म्येँ नं न्ह्यब्वःगु खः ।
प्रशिक्षक धर्म मुनिकारं न्हापा न्हापा गुरुं चेलायात जक स्यनेगु याना वयाच्वंगु परम्परा थौं लिपिवद्ध जूगु कारणं स्यनीपिं व सयेकीपिं निगुलिं पक्षयात अःपुगु खँ कनादिल।
ज्या�वलय् मूपाहां सभासद् तिर्थराम डंगोल, ज्यापु महागुथिया नायः विपेन्द्र महर्जन, वरिष्ठ गायक भृगुराम श्रेष्ठ, बुद्धराम महर्जन, न्हुच्छे बहादुर डंगोलपिंसं नं नुगःखँ प्वंकादीगु खः ।
श्री नाट्यश्वर गुथिया नायः आशाकाजी महर्जनया सभापतित्वय् न्ह्याःगु उगु ज्याझ्वलय् ग्वसाः खलःया कजि रत्नकाजी महर्जनं लसकुस यानादीगु खः ।
