हेटौंडाय् नं गथांमुगः
हेटौंडा (सन्ध्या टाइम्स)/दँया न्हापांगु नखः गथांमुगः हेटौंडाय् नं न्यायेकल। थीथी नेवाः संघसंस्थां मंकाः कथं गथांमुगः न्यायेकूगु खः। हेटौंडाया कृष्ण मन्दिरय् धिमे व थीथी बाजं थानाः गथांमुगः सालाः हेटौंडा बजाः चाःहीकाः राप्ती खुसिइ वाये यंकूगु खः ।
अथे हे गथांमुगःया हे लसताय् गथांमुगः व दछिइ वइगु नखःचखः सम्बन्धी अन्तर्क्रिया नं हेटौंडाय् न्ह्याकूगु खः। नेवाः सांस्कृतिक पुचः मकवानपुरं याःगु उगु ज्याझ्वलय् मकवानपुर उद्योग बाणिज्य संघया अध्यक्ष अरुणराज सुमार्गी मूपाहांकथं झाःगु खःसा ज्याझ्वः पुचःया नायः योगेश्वर श्रेष्ठया अध्यक्षताय् न्ह्याःगु खः। ज्याझ्वलय् नेवाः सांस्कृतिक पुचःया सल्लाहकार क्षितिराज बैद्य, नेपालभाषा खलः मकवानपुरया न्वकु नन्दरत्न स्थापित, साहित्यकार सूर्यमान रञ्जितपिंसं न्ववानादीगु खः।
गथांमुगः, बिशेष यानाः नेवाः समुदायं न्यायेकीगु जूगुलिं थुगु नखः कुन्हु गथांमुगःयात थीकाः अंगू न्ह्यायेगु चलन नेवाः समाजय् ल्यं दनि। न्हिछि थनातःगु गथांमुगःयात निभाः लुकुंबीवं त्वाःया मनूतय्त छ्वालीप्वाः ज्वंकाः स्वक्वः तक ग्वतुइके धुंकाः उकी हे तयाः खुसिइ वाये यंकीगु चलन दु ।
