माओवादीया मेगु गलत निर्णय

सानुराजा शाक्य

यक्व दिं लिपा नेपाली कांग्रेस संसदीय दलया नेता रामचन्द्र पौडेलया ख्वालय् न्हिलासू खनेदत। वर्तमान सरकारया मू गठबन्धन दलत माआवादी व प्रधानमन्त्रीया दथुइ ब्वलंगु विवादं सरकार धरापय् लायेवं वय्कःया ख्वाः चकंगु खः। थ्व निगू दलया गठबन्धनं थः प्रधानमन्त्री जुइगु म्हगस वंगु खुला न्ह्यः चब्बूगु घालय् मलम तयाः लंके खंगुलिं रामचन्द्र पौडेलया ख्वाः चकंगु खः। इलं गबलें खिउँगु ख्वाः, गबलें न्हिउगु ख्वाः खने दइगु थज्याःक्वथ्याः नेपाःया नेतातय् ख्वालय् पिलू वयाच्वनी। त्याइबलय् हौसे जुइपिं व बुइबलय् ख्वाः खिउँकीपिं नेतात जननेता जुइ फइ मखु। तर वर्तमान ईया मू राजनीतिक दलया छगू दर्जन शीर्ष नेतातय्गु इलय् ब्यलय् वइगु प्रतिक्रिया स्वयेबलय् थुपिं नेतात जननेता जुइत योग्यता दुपिं धकाः नालेथाय् मदु। ख्वालय् खने दइगु 'एक्प्रेसन'य् उकथंया लसता व दुःख तुलनात्मक रुपय् नेपाली कांग्रेसया मदुम्ह नेता गिरिजाप्रसादयाके धाःसा म्हो हे जक खने दइ। वहे जुयाः जुइ गिरिजा सीत्ययेकाः अन्तिमय् फुकसिया प्रिय जुयाः मंत ।

मुलुक आखिरय् हानं छक्वः सत्ता परिवर्तनया गोल-चक्करय् लात। भदौ १४ न्ह्यः जुइमाःगु शान्ति व संविधानया ज्यायात वाय्त्यः फ्वाय्त्यः यानाः दलत हानं छकः प्रधानमन्त्री हिलेगु अभ्यासय् लायेत्यंगु दु। थ्व इलय् एकीकृत माओवादी दुनेया अन्तरविरोध व अन्तरसंघर्ष थामथुम यायेगु निंतिं जूगु मन्त्री इना नयेगु सम्झौताया प्रत्यक्ष लिच्वः अन्तत सरकार क्वःदलाः क्वचाइगु जूगु दु। एकीकृत माओवादी वर्तमान सरकारय् दुपिं थः मन्त्रीतय्त पुनर्गठन यानाः नीप्यम्हेसित मन्त्री दयेकेत धलःपौ प्रधानमन्त्रीयात लः ल्हायेधुंकाः पिदंगु विवादं अन्ततः झलनाथया राजीनामाय् क्वचाइगु खनेदु। एकीकृत माओवादीया थ्व निर्णय अन्ततः एकीकृत माओवादीया निंतिं दूरगामी गल्ती जू वनीगु सम्भावना यक्व दु।
न्हापां ला थ्व ई मन्त्रीमण्डल पुनर्गठनया ई मखु। स्टेसन त्वःफीधुंकाः रेल लिहां वयेगु ज्या थें जूगु दु एकीकृत माओवादीया थ्व निर्णय। नीप्यम्ह मन्त्री छ्वयेगु एकीकृत माओवादीया निर्णय नं स्टेसन त्वःफीधुंकाः रेल गयेगु कुतः खनेदुगुलिं थुकिं माओवादीया परिपक्व निर्णय मजुल। थुकिं एकीकृत माओवादीयात लाइगु बांमलाःगु लिच्वः थुकथं परिभाषित जुइ - जम्बो मन्त्रीमण्डलया आलोचना याइगु दलं हे मौकाय् लात धाःसा थःपिंसं जम्बो मन्त्रीमण्डलया प्रस्ताव यायेत लिमचिलीगु जुयाच्वन। थुकिं यानाः एकीकृत माओवादी दुने क्रान्तिया धाः गुलि मन्वयेधुंकल धकाः जनताया दथुइ क्यने थें जुल। १४ द्वः नेपालीया बलिदान मात्र माओवादीया अमुक नेतातय्त मन्त्री दयेकेत याःगु परिवर्तनय् हिल। पार्टी दुने खनेदुगु सैद्धान्तिक अन्तरविरोधया हल मन्त्री इनाः नयेवं सामसुम जूगु खनीबलय् माओवादी दुने जुयाच्वंगु सैद्धान्तिक बहस मात्र जनतायात झंगः लायेत क्यंगु नाटकय् हिल। क्रान्तिया खँ ल्हाइम्ह मोहन वैद्यया नेतातय्त तकं फतिंफतले अप्वः मन्त्रीइ दुथ्याके माःगु माग उमिगु सिद्धान्त मब्वनीगु सफूया पानाय् च्वंगु जलप स्वयां अप्वः मखु धइगु क्यन। उलि जक मखुकि थ्व नीप्यम्ह मन्त्री नीप्यघौया निंतिं जक जूसां दयेका बिउ धइगु याचनां एकीकृत माओवादी दुने गुलि विचलन खनेदत धइगु नं प्रस्ट यात। मन्त्रीमण्डल समावेशी जुइमाःगु नामय् छन्हुया निंतिं जक जूसां मन्त्री धायेके माःगु रहर समावेशी सिद्धान्तया हे बेइज्जती खः। दकलय् अप्वः शालिन नेता व अवसरवादीया आरोपं मुक्त जुयाच्वंम्ह एकीकृत माओवादीया न्वकु नारायणकाजीया चरित्र नं पदलोलुप नेतातय् धलखय् सूचीकृत जुल ।

यदि मन्त्रीतय्त शपथ ग्रहण मयाकूसा थःपिनि समर्थन लितकायेगुनिसें माओवादी मन्त्रीतय्पाखें बिउगु राजीनामा माओवादी खनेदुगु बालमनोरोगया पुनरावृत्ति जुइफु। गुगु जिद्दीं यानाः नये दइगु भ्वय्ब्व नं नयेमखंक द्यां लायेत बेर मदु। वंगु निला स्वलाया दथुइ शान्ति व संविधानया ज्या मन्ह्याःगुया दोष एकीकृत माओवादीया आन्तरिक कलह हे खत धइगु प्रमाणित जूगु कारणं म्हिगः थें एकीकृत माओवादीं शान्ति व संविधानया ज्या मन्ह्याःगु कारण कांग्रेस, एमाले वा सरकारयात पाः यानाः सुं पत्याः मजुइगु अवस्थाय् दु। थ्व इलय् झन् समावेशी यायेगु नामय् जम्बो मन्त्रीमण्डल दयेकेत एकीकृत माओवादीं बिउगु सिफारिस लागू यायेगु अवस्थाय् प्रधानमन्त्री झलनाथ खनाल मदु। छाय्कि जेठ १४ य् जूगु सहमति कथं प्रधानमन्त्री पदं राजीनामा बी धकाः संसदय् बचं बियातःगु अवस्थाय् जम्बो मन्त्रीमण्डल दयेकाः थःगु पद ल्यनेवं थौंया राजनीतिक समस्या ज्यनीगु स्वयां गथः चिनीगु पक्का दु। थुज्वःगु इलय् एकीकृत माओवादी व एमालेया झलनाथ खनाल दथुइ सम्बन्ध स्यनीगु कथंया पलाखं अन्ततः हानं प्रधानन्त्री पद कांग्रेसया ल्हातय् लाः वनी। सहज कथं प्रधानमन्त्रीया बहिर्गमन यानाः एमाले नाप जूगु न्हय्गू बुँदाया सहमतिकथं प्रधानमन्त्री नये दइगु अवसर एकीकृत माओवादीया खः। तर वर्तमान सरकारया गठबन्धन त्वाः दल धाःसा नारायणकाजीयात उपप्रधानमन्त्री दयेकेगु लोभय् वयेत्यंगु प्रधानमन्त्री पद नापं तापाइ। थ्व अवस्थाय् झलनाथ धुंकाःया मन्त्रीमण्डलय् एकीकृत माओवादी मन्ह्यनेफु। थुकिया लिच्वः हानं शान्ति व संविधानयात तापाका छ्वइ। उकिं इलय् हे एकीकृत माओवादीं थःगु निर्णयय् पुनर्विचार यानाः थःगु गल्ती सुधार याये फयेकेमाः। गठबन्धन सरकार खः थःगु भागय् लाःगु ब्व थः यत्थे यानाः नयेगु ई पुलेधुंकल। थःगु समस्या कतःया छ्यनय् तयेवं थःगु छ्यं याउइँ मखु। एकीकृत माओवादीया नितिं समावेशी मन्त्रीमण्डल दयेकेगु खःसा थःगु नेतृत्वया सरकार याकनं स्वनाः मन्त्रीत सिफारिश यायेगु हे बुद्धिमत्तापूर्ण निर्णय जुइ ।

हानं मेगु छता गल्ती प्रधानमन्त्रीपाखें नं खनेदत। वर्तमान मन्त्रीमण्डल पुनर्गठन यायेगु कि मयायेगु धकाः निर्णय यायेगु नितान्त प्रधानमन्त्रीया अधिकारया खँ खः। थुकिया नितिं एमाले व एकीकृत माओवादी दुने जक सहमति जूसां गाः। नेपाःया प्रतिपक्षया ज्या न्ह्याबलें सरकार क्वःथलेगु अले थःपिनि अनुकूलया सरकार वयेमा धइगु खँ मू दलत फुकसियां नितिं लागू जुयाच्वंगु दु। उकिं प्रतिपक्ष कांग्रेसया सहमति कयाः जक मन्त्रीमण्डल विस्तार याये धायेगु नं परिपक्व निर्णय मखु। प्रतिपक्षीतसें प्रधानमन्त्रीया राजीनामा हे फ्वनाः संसद अवरुद्ध यानाच्वंगु इलय् मन्त्रीमण्डल विस्तार यायेगु एजेण्डाय् सहमति कायेगु कुतः मूर्खता सिबें मेगु छु जुइ?

More Stories Like this