थ्व नं संविधान दयेके मबीगु चलखेल?
माओवादीया फुक्कं मन्त्रीतय्सं मंकाः कथं राजीनामा बीवं प्रधानमन्त्री झलनाथ खनाल धाथें हे संकटय् लाः वंगु दु। माओवादीं सिफारिस याःपिं मन्त्रीतय्त सपथ ग्रहण मयाकू धकाः थःपिनि फुक्कं मन्त्रीतय्सं राजीनामा याकूगु खः। तर थ्व इलय् प्रम खनालं यदि सपथ ग्रहण मयाकल काःसा माओवादीं समर्थन लित काइगु व सपथ ग्रहण याकल धाःसा थःगु हे पार्टीं विरोध याइगु मछिंगु स्थिति जुयाच्वंगु दु। उकिं वय्कःया लागिं न्ह्यागु हे लँपु ज्वंसां नं संकट हे वइगु जुयाच्वंगु दु। थज्याःगु अवस्थाय् वय्कलं नितां ज्या मयासे तप्यंक राजीनामा यायेमाः धाइपिं नं उतिकं मदुगु मखु ।
दकलय् न्हापां ला माओवादीं थःगु पार्टीया आन्तरिक समस्या समाधान यायेगु ज्याय् मन्त्रिमण्डल पुनर्गठनयात ल्वाकछ्याये हःगु हे पाय्छि मजूगु पलाः खः। माओवादीया आन्तरिक कचवंया लिच्वः सरकारय् व सरकारया कचवंया लिच्वः संविधान व शान्ति प्रक्रियाय् लाः वनाच्वंगु दु। राजनीतिक पार्टीतय्सं शान्ति व संविधान निर्माणया ज्या क्वचायेके धकाः काःगु भदौ १४ या ई वयेत आः लछि हे म्वाःल। थज्याःगु अवस्थाय् हानं सरकार गठनया चलखेलय् लगे जुइगुया अर्थ भदौ १४ कुन्हु नं संविधान जारी मयायेगु हे धाःगु खः। राजनीतिक पार्टीत वास्तवय् देशय् न्हूगु संविधान जारी मयायेगु हे षडयन्त्रय् लगे जुइधुंकूगु आभास थ्व स्वयां न्ह्यः मजुयाच्वंगु मखु। उमिसं आः क्यनाच्वंगु थ्व चलखेलं अज्याःगु षडयन्त्रयात पुष्टि यायेत तिबः बीगु खँय् शंका मदु। वास्तवय् देय्या राजनीतिक दलत जनतापाखें जनताया लागिं जनतां हे दयेकीगु संविधान बीगु पक्षय् मदु धइगु खँ आः पुष्टि जुइ जक ल्यं दनि ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
