तलब/मतलब !

सूर्यमान राजभण्डारी

बजेट भाषण जुइ न्ह्यः कर्मचारीतय् दथुइ चर्चा/परिचर्चा जुइ - तलब बढे जुइ कि मजुइ। कर्मचारीत आशाकुति जुयाः बजेट भाषण न्यनी। तलब बढे जूसां मजूसां बजाः भाः बढे जुइ। तलब बढे जूसा कर्मचारीत क्षणिक लय्ताइ। क्याल्कुलेटर न्ह्यःने तयाः क्याल्कुलेशन याइ। जिगु थुलि जुल, छंगु थुलि जुल। तलब बढे मजूसा सरकारयात दोष बी। मेगु सालय् पक्का जुइ जी धकाः अनुमान याइ।
उकुन्हु बजेट भाषण न्यना, टिभिइ स्वया। तलब बढे जुल। पासां फोन याना हल - बधाई ! नापं टिभि स्वयाच्वंम्ह तिरिमय्जु हाल छुकिया बधाई? बजाः भाः स्वदुगं थहां वनीगु जुल, बधाई व्यापारीतय्त का। तिरिमय्जुं कर्मचारीया पीडा थुइकल। छेँनं पिहां वना, पसल्यां मुसुमुसु न्हिलाः धाल- तलब बढे जुल नि। बजाः भाः थकायेगु पसल्याया पूर्व संकेत खः थ्व ।

थुगुसी तलब बढे जुल। बजेट भाषण जुइ न्ह्यः हे तलब बढे जूगु बुखँ वल। बजेट भाषण लिपा बढे जूगु तलब कर्मचारीतय् निंतिं असन्तोष जुल। तलब बृद्धिया नामय् कर्मचारीतय्त बिया वयाच्वंगु महंगी भत्ता नं क्वपालिगु जुल। बजाःभाः क्वपालेगु नीति नियम धाःसा छुं हे महःगु जुल ।

गुलि बढे जुइ माःगु खः उलि तलब बढे मजुल। प्याकेजय् तलब बढे जुइ माःगु, बढे जुल प्रतिशतय्। क्वय्या कर्मचारीतय्त अप्वः प्रतिशत, च्वय्या कर्मचारीतय्त म्हो जक प्रतिशत। अय्नं प्वःप्वः तलब नइपिं च्वय्या कर्मचारीत हे खः। सुबिधा-सवारी, संचार सकतां च्वय्या कर्मचारीतय् निंतिं जक खः। प्रतिशतय् अप्वः क्यंगु क्वय्या कर्मचारीतय्त ह्ययेकेगु स्वांग जक खः ।

तलब बृद्धि प्रति असन्तोष कर्मचारीत कार्यालय मवँसे सिंहदरवार वन। धर्ना च्वन। नारा नं थ्वयेकल। घौ निघौ पुलिस थानाय् नं च्वन। थाय्थासय् सरकारी ज्यासःत बन्द नं यात। लिच्वः मवःनि। बढे जूगु तलब नं ल्हातय् मलाःनि। सर्वसाधारणं धाइ-कर्मचारीतय्त न्ह्याक्व बिउसां मगाः। कर्मचारीतय्सं धाइ- सरकारं गाक्क तलब हे मबिउ। कर्मचारीतय् तलब बढे जुइ, सर्वसाधारणया छु?
चिनी किलोय् नितका बढे जुल कि च्या छगू गिलासय् छतका। पेट्रोलियम छगू लिटरय् प्यतका बढे जुल कि गाडी भाडाय् नितका। तलब बढे जुइगु गबले गबले, बजाः भाः ह्वात्त बढे जुइ। ज्यामि, मजदुर, भरियाया ज्याला सरकारं बढे याइ मखु, थम्हेस्यां हे बढे याइ। तलब बढे जुल, जिमित नं बढे यानाः बी माल धाइ। म्हुतु सकसिकें दु, सकसिनं जा हे नइ, घाँय् सुनानं नइ मखु ।

तलबया मतलब बजाःभाः जुल। थ्व गज्याःगु पर्याय? सकसिनं धाइ- झीसं जक धयां छु याये? बजाः भाः बढे याइपिंसं बढे याइ, सुनां छु धाइ?

www.thesuryaman.blogspot.com

More Stories Like this